د کمال خان بند د پرانیستنې جشنوارې ته د چمتووالي په موخه غونډه وشوه
د کمال خان بند پرانیستنې جشنوارې ته د تیاري په پار نن د لوړو زده وزارت علمي معین په مشري غونډه وشوه.
په دغه ناسته کې د عدلیې، اطلاعاتو او کلتور، حج او اوقافو، کرنې او مالدارۍ، سوداګرۍ او صنایعو وزارتونو او همدارنګه د چاپېریال ساتنې ملي ادارې ریاست، د افغانستان علومو اکاډمي، کابل ښاروالۍ، د چاپېریال ساتنې ملي ریاست، د اوبو د تنظیم ملي ادارې، د اوبو څېړنې او چاپېریال ساتنې ملي مرکز، د المپیک ملي ریاست، د کرکټ بورډ ادارې او د ځینو نورو اړوندو ادارو استازو ګډون کړی وو.
په پیل کې د لوړو زده کړو وزارت علمي معین پوهنمل عبدالتواب بالاکرزي د ښکېلو ادارو د پوره تیاري او لازیاتې همغږۍ د اهمیت په اړه وینا وکړه او ویې ویل، چې لوړو زده کړو وزارت په خپلو تحصیلي بنسټونو کې نوی درسي کال د (زموږ اوبه زموږ ابروه ده) په شعار پیل کړ او په دې اړه د علمي مقالو راټولول په ډېرې چټکۍ دوام لري.
په دغه ناسته کې ټولو ګډونوالو خپل عملیاتي پروګرامونه تشرېح کړل او د کمال خان بند د پرانیستنې په جشنواره کې یې د برخې اخیستلو او کار کولو ډاډ ورکړ. هغه پروګرامونه چې په نننۍ ناسته کې یې په اړه خبرې وشوې او نظریات پکې ورکړل شول، د کب تر ۲۴مې بشپړېږي. په دغه ناسته کې په دې هم خبرې وشوې چې د کمال خان بند پرانیستنه به په ملي شور او ځوږ، د موسیقۍ پروګرامونو، مشاعرو، نقاشیو، وزلوبې، فوټبال او نورو زیاتو مینوالو لرونکو لوبو سره پیل او د دولتي او نورو رسنیو له لوري به خپرېږي.
د یادولو ده چې د لوړو زده کړو په حوزه کې د استادانو او محصلینو له لوري (اوبه د افغانستان په ملي حیات کې) او همدارنګه د کمال خان بند د ارزښت په اړه ۱۱ مقالې تیارې شوې او دغه پروسه دوام لري.
د غوره مقالو لپاره نغدي جایزې او ستاینلیکونه په پام کې نیول شوي دي.
