په نیمروز ولایت کې د قضاء او افتاء او حدیث علومو د ماسټري پروګرام پیل شو.
د قضاء او افتاء او حدیث علومو د ماسټري پروګرامونو د پرانیستې په موخه د زرنج ښار په دانشسرای عمر فاروق (رض) مدرسه کې په همدې موخه جوړو شوو مراسمو کې د لوړو زده کړو وزارت د دیني جامعاتو او تخصصاتو لوی ریاست د دیني معتبرو جامعاتو د ثبت او ایجاد رییس مولوي اسدالله فرید، د لوړو زده کړو وزارت ویاند مولوي احمد تقي، د لوړو زده کړو وزارت د څېړنې، تالیف او ژباړې رئیس دوکتور حمیدالله مزمل، د دولتي ادارو رئیسانو، د نیمروز د مدارسو مسؤلانو او د یادې مدرسې سلګونو طالبانو حضور درلود.
مراسم د قرانکریم په مبارکو ایاتونو سره پیل شول او وروسته د لوړو زده کړو وزارت د دیني جامعاتو او تخصصاتو لوی ریاست د دیني معتبرو جامعاتو د ثبت او ایجاد رییس مولوي اسدالله فرید وویل: «د لوړو زده کړو وزارت د مشرتابه د هدایت پر اساس له نېکه مرغه په نیمروز کې د قضاء او افتاء او حدیث علومو د ماسټري پروګرام نن پیلیږي، چې موږ یې د پرانیستې شاهدان یو.»
ښاغلي فرید زیاته کړه چې زموږ موخه د علمي کادرونو رزونه او ټولنې ته وړاندې کونه ده او لوړو زده کړو وزارت په پام کې لري چې په ټول هېواد کې د ځوانانو لپاره د غوره تحصیلاتو زمینه برابره کړي. نوموړي زیاته کړه چې په نیږدې راتلونکي کې به د علماء کرامو د اسنادو اروزنه پیل شي.
د دانشسرای عمر فاروق (رض) مدرسې د حدیث استاد مولوي عصمت الله مولوي زاده یاد ولایت ته د لوړو زده کړو وزارت لوړ پوړي پلاوي له ورتګ څخه مننه وکړه او ویې ویل، چې په نیمروز ولایت کې له پخوا تر اوسه د دیني علومو په برخه کې د نورو ولایتونو طلاب زده کړې کوي او ټولنې ته یې ډېر دیني عالمان او مجاهدین وړاندې کړي دي.
ښاغلي مولوي زاده زیاته کړه چې د ا.ا.ا او لوړو زده کړو وزارت څخه مو هیله دا ده چې په نیمروز ولایت کې د لوړو زده کړو بنسټونو د ځواکمنتیا په برخه کې همکاري وکړي.
