د لوړو زده کړو سرپرست وزیر کندهار ولایت ته د رسمي سفر په ترڅ کي، د کندهار پوهنتون له مسؤلینو سره ناسته وکړه.
په یاده ناسته کې د کندهار پوهنتون رئیس او مشرتابه پلاوي، د پوهنځيو رئیس صاحبانو، استادانو او اداري کار کوونکو ګډون کړی و. د لوړو زده کړو سرپرست وزیر شیخ الحدیث مولوي نداء محمد ندیم صاحب د یاد پوهنتون له مسؤلینو سره په خبرو کې وویل: «د هېواد د ځوان نسل سالمه روزنه زموږ او ستاسو مسؤلیت دی او په دې ډګر کې ډېر کار او هڅو ته اړتیا ده.» نوموړي زیاته کړه چې د ا.ا.ا او د لوړو زده کړو وزارت رهبري په هېواد کې د لوړو زده کړو د پرمختګ لپاره د اسانتیاوو په برابرولو کار کوي. د لوړو زده کړو سرپرست وزیر د کندهار پوهنتون مسؤلینو ته د هغوی د ستونزو د حل او غوښتنو د پوره کولو په برخه کې د پوره همکارۍ ډاډ ورکړ. وروسته د کندهار پوهنتون مسؤلینو د دغه پوهنتون فعاليتونه، لاسته راوړنې او راتلونکي پلانونه وړاندې کړل او په اکاډميکو او اداري برخو کي یې د تشکيل زیاتېدو، د کندهار پوهنتون لپاره د ماسټرۍ برنامو رامنځ ته کول، د پوهنتون د زرغونتیا لپاره د عوایدو ځانګړي کول، په پوهنتون کې د مسجد بیا ترمیم او د کندهار پوهنتون د استادانو او محصلانو لپاره د بورسونو ورکولو غوښتنې شریکې کړې، چې د لوړو زده کړو سرپرست وزیر د همکارۍ ژمنه ورسره وړکړه.
