د لوړو زده کړو وزارت پلاوی ددې وزارت د تخصصاتو او جامعاتو عمومي ریاست د معتبرو ديني جامعاتو د تأسیس او ثبت رياست رئيس مولوي اسدالله فريد په مشرۍ د نېمروز لوړو زده کړو مؤسسې د څارنې او ارزونې په موخه ياد ولایت ته لاړل.
دغه پلاوي د يادې تحصيلي مؤسسې له بېلا بېلو څانګو څخه تر څارنې او ارزونې وروسته د يادې تحصيلي مؤسسې د مشرتابه غړو، استادانو او کارکوونکو سره د نيمروز د لوړو زده کړو مؤسسې د ښوونېزو پروګرامونو د پياوړتيا، زده کړو ته د ځوانانو د هڅولو او د نېمروز لوړو زده کړو مؤسسسې کې د شته ننګونو د حل په اړه خبرې وکړې.
مولوي فريد د علم او تحصيلي بنسټونو د اهميت په اړه د خبرو پر مهال د کيفيت د تضمين پروسې د تطبيق په برخه کې د لوړو زده کړو وزارت د هڅو، د تدريس، اداري، لابراتوار، جومات او د کتابتونونو ترميم ته د پاملرنې په اړه خبرې وکړې.
د معتبرو دیني جامعاتو د ثبت او تأسيس رئيس ډاډ ورکړ، چې د لوړو زده کړو وزارت د شته امکاناتو له مخې به د نيمروز د تعليمي ادارو د اړتياوو د پوره کولو لپاره اقدام وکړي.
د يادونې وړ ده، چې له دې وړاندې د کندهار او ارزګان ولایتونو د لوړو زده کړو تحصيلي بنسټونو څارنه او ارزونه د یاد پلاوي له لوري ترسره شوي وه.
