په پام کې ده چې مخابراتي او انټرنیټي خدمتونو ته د هېواد د تحصیلي بنسټونو استادانو او محصلینو اسانه لاسرسي په موخه، د هېواد په تحصیلي بنسټونو کې د افغان بېسیم شرکت رسمي نماینده ګۍ جوړې شي.
د لوړو زده کړو وزارت مالي او اداري معین مولوي حافظ محمد حامد حسیب د دغه شرکت له استازو سره په کتنه کې د هېواد په تحصیلي بنسټونو کې د افغان بېسیم مخابراتي شرکت د نماینده ګیو له جوړېدو څخه خوښي څرګنده کړه او دا یې د لوړ کیفیت او ارزانه مخابراتي او انټرنېټي خدمتونو ته د استادانو او محصلینو د اسانه لاسرسي په برخه کې ګټور ګام وباله.
هغه وویل، لوړو زده کړو وزارت په دې وروستیو کې محصلینو او استادانو د علمي او تدریسي فعالیتونو د پراختیا او د مخابراتي او انټرنیټي خدمتونو ته د اسانه لاسرسي په موخه له افغان بېسیم شرکت سره یو تفاهم لیک لاسلیک کړ، چې د دغه تفاهم لیک د محتوا پر بنسټ، به یاد شرکت دوی ته د نورو خدمتونو تر څنګ په مناسبه بیه ځانګړي سیم کارتونه هم برابروي.
په دې کتنه کې د لوړو زده کړو وزارت د معلوماتي ټکنالوژۍ رئیس انجنیر احمد ضیاء جبارخیل هم د موضوع په اړه خبرې وکړې او یو ځل بیا یې د یاد تفاهم لیک په تطبیق او چټکتیا او دوه اړخیزو همکاریو ټینګار وکړ.
په ورته وخت کې د افغان بېسیم مخابراتي شرکت مسؤلینو د لوړو زده کړو وزارت له پرمختیايي پروګرامونو خوښي څرګنده کړه او په دې برخه کې یې د هر راز همکارۍ ژمنه وکړه.
د یاد تفاهم لیک پر بنسټ د افغان بېسیم مخابراتي شرکت په پام کې لري چې د لوړو زده کړو وزارت استادانو، محصلینو او کارمندانو لپاره د ځانګړو سیم کارتونو په برابرولو سره انټرنیټي کڅوړې، د لنډو غږیزو او لیکلي پیغامونو له لارې د هیواد د مرکز او ولایتي محصلینو لپاره په ارزانه بیه انلاین کورسونو، د «موبایل پیسو» سیسټم له لارې د کارمندانو د معاشونو د ورکړې، د کال سنټر جوړولو او د نورو خدمتونو وړاندې کولو په برخه کې همکاري وکړي.
