کابل د طبي علومو پوهنتون "ابو علي ابن سینا" آنلاین مجلې د ویب سایټ کار بشپړ شو

د کابل طبي علومو پوهنتون "ابو علي ابن سینا" آنلاین مجلې د ویب سایټ کار چې دوه میاشتې مخکې پیل شوی و، بشپړ شو.

هغه غونډه چې په دې اړوند کابل طبي پوهنتون کې جوړه شوې وه، د یاد پوهنتون رئیس پوهاند دوکتور وحید الله مومند استادانو ته مبارکي وویله او د یاد طبي پوهنتون علمي آنلاین مجلې د ویب سایټ د کار د پروسې بشپړیدل یې د علمي فعالیتونو په برخه کې یو اړین ګام وبللو.

دوکتور مومند لیکل او لوستل د یو علمي بڼسټ له ځانګړنو څخه وبلل او زیاته یې کړه: "هغه ملت چې لوستا کوي او لیکل نه کوي تجربې تکراروي او هیڅکله پرمختګ نشې کولای." پوهاند وحید الله مومند زموږ ګران هیواد یو وخت د علم او افکارو د تولید په برخه کې د سیمه ییزو هیوادونو په کچه پرمختللی هیواد یاد کړ او ویې وویل: "هیڅ شخص او ټولنه د ژوند په هیڅ برخه کې که هر څومره یې پرمختګ کړی وي د علم او افکارو تولید ته اړتیا لري او موږ د نورو هیوادونو په پرتله خپلې روښانه علمي راتلونکې لپاره ډیر کار او زیار ته اړتیا لرو."

وروسته په علمي څیړنیزو چارو کې د لوړو زده کړو وزارت سلاکار دوکتور محمد وسیم اقبال په طبي برخو کې د آنلاین علمي مجلې خپرولو د ویب سایټ چمتو کولو لپاره د یاد پوهنتون له کار او هڅو څخه مننه وکړه او هغه یې په طبي پوهنتون کې د څیړنیزو معیارونو د بنسټیز کولو لپاره مؤثره او پر وخت هڅې وبللې.

دکتور اقبال په پوهنتونو کې علمي او څیړنیز انسجام د هیواد د پرمختګ لامل وبلل او ویې ویل: "موږ که هر څومره زیات علمي تولیدات ولرو د ژورنال او علمي پرتلې ځانګړتیاوو او نړیوالو معیارونو په نظر کې نیولو نه بغیر هیڅ ډول علمي اهمیت نلرو"

د لوړو زده کړو وزارت سلاکار وویل: "د پوهنتونو د پیژندلو او په سیمه ییزه او نړیواله کچه یې د علمي سیالۍ صحنې ته راوړلو لپاره، موږ هڅه کړې ده تر څو د ISSN جواز ترلاسه کړو او د علمي مؤثرو برنامو په طرحه کولو سره خپل فعالیتونو معیاري او خپل علمي بڼسټونه د نړیوالو لپاره د منلو وړ وګرځوو."

همدارنګه د یاد پوهنتون استاد او د علمي څیړنو د مرکز آمر پوهاند عبدالواسع سلطاني، د لوړو زده کړو وزارت او ډاکټر محمد وسیم اقبال له پاملرنې څخه چې د کابل طبي علومو پوهنتون "ابو علی ابن سینا" مجله یې بیا احیاء کړه، مننه وکړه.

د علمي څیړنو مرکز آمر وویل چې د کابل طبي علومو پوهنتون د مجلې د آنلاین خپرونې لپاره د ویب سایټ کار بشپړ شوی او ډیر ژر به په رسمي توګه پرانیستل شي.

یاد مراسم د لوړو زده کړو وزارت سلاکار ډاکټر محمد وسیم اقبال ته د کابل طبي علومو پوهنتون ابو علي ابن سینا د پلاوي لخوا د مننې یوې لوحې قاب په ورکولو سره پای ته ورسیدل.