لوړو زده کړو وزارت افغان ورزشکار او د جوجېتسو او ام ام اې برخې اتل ته د لوړو زده کړو لار هواروي
د لوړو زده کړو وزیر دوکتور عباس بصیر د هېواد له دغه اتل سره د لیدو پر مهال د لوبو په برخه کې د هغه هڅې او د افغانستان لپاره د لوبو په برخه کې د اتلولیو ګټلو له امله مننه وکړه او ویې ویل چې د لوړو زده کړو وزارت په پام کې لري، د هغو کسانو لپاره د لوړو زده کړو لار هواره کړي چې په دې برخه کې ځلیږي.
حسین بخش صفري د لوړو زده کړو وزیر له هڅونې څخه مننه وکړه او له هغه څخه یې وغوښتل چې د هېواد په یوه خصوصي پوهنتون کې د زده کړو لار ورته هواره کړي. همدارنګه هغه وویل چې هیله لري، د لوبو تر څنګ د پوهې له لارې هم خپل هېواد او خلکو ته خدمت وکړي.
دوکتور بصیر له علم او پوهې سره د هغه مینه وستایله او ژمنه یې ورسره وکړه چې تر خپلې وسې به هېڅ ډول هڅې ترې ونه سپموي.
حسین بخش صفري افغان لوبغاړی د جوجېتسو په برخه کې د ترکمنستان ۲۰۱۷ کال د اسیایي او ام ام اې څو لوبو اتل دی او همدارنګه د جوجېتسو فول کنتاک برخې درجه بندۍ په لومړیو کې دی.