د لوړو زده کړو وزیر د جمهوري اسلامي ایران له سفیر سره وکتل
د لوړو زده کړو وزیر په کابل کې د ایران اسلامي جمهوريت له سفیر سره په کابل پوهنتون د ملي ژبو او ادبیاتو پوهنځی نوې ودانۍ د کار بیا پیل په پار په دغه پوهنتون کې خبرې وکړې.
په دغه ناسته کې دوکتور عباس بصیر په داسې حال کې چې د کابل پوهنتون مشرتابه هم شتون درلود، د دواړو هېوادونو تر منځ ژورو دیني، کلتوري او ژبنیو مشترکاتو ته اشاره وکړه او په بېلابېلو برخو په ځانګړي ډول لوړو زده کړو برخه کې یې د ایران له مرستو مننه وکړه.
د لوړو زده کړو وزیر د یادې پروژې د کار پر بیا پیل ټینګار وکړ او د هغو ستونزو د هواري غوښتنه یې وکړه چې د کار د درېدو لامل شوي دي.
همدارنګه په کابل کې د ایران اسلامي جمهوریت سفیر بهادر امینیان هم د یادې ودانۍ د کار بیا پیل ته لېوالتیا وښوده او په دې برخه کې یې د ستونزو د هواري غوښتنه وکړه. دغه راز زیاته یې کړه چې د یادې ودانۍ د کار د بیا پیل په برخه کې به هېڅ ډول هڅې ونه سپموي.
وروسته د کابل پوهنتون رییس پوهاند دوکتور محمد عثمان بابري د یادې پروژې په اړه معلومات وړاندې کړل او ویې ویل، چې تر دې مهاله د یادې پروژې کار ۳۰ تر ۴۰ سلنه بشپړ شوی دی.
د لوړو زده کړو وزیر له یادې ناستې وروسته په داسې حال کې چې په کابل کې د ایران اسلامي جمهوريت سفیر او د کابل پوهنتون رییس هم شتون درلود له یادې ودانۍ څخه لیدنه وکړه.
