د لوړو زده کړو وزارت د پلاوي او ښوونې او روزنې پوهنتون د مشرتابه غړو ګډه ناسته وشوه
هغه ناسته چې د ښوونې او روزنې پوهنتون د غونډو په تالار کې د لوړو زده کړو وزارت د پلاوي او د یاد پوهنتون د مشرتابه پلاوي ترمنځ د ا.ا.ا د پرګرامونو او موخو په اړه جوړه شوې وه د یادو بنسټونو د استازو سربېره ګڼ شمېر استادانو او اداري کارکوونکو په کې برخه لرله.
په دغه ناسته کې د لوړو زده کړو وزارت د نشراتو، اطلاعاتو او عامه اړیکو ریاست سرپرست استاد دوکتور دلاور سیلاب د افغانستان د ښوونیز سیستم د لاپیاوړتیا ترڅنګ په اقتصادي حالت او تقویې وینا وکړه. هغه وویل:" افغانستان په نړۍ کې د معادنو له پلوه یو بډایه هېوادونو له جملې څخه دی چې باید په دې برخه کې ښه مسلکي او په کار پوه کسان وروزل شي." همداراز یادونه وشوه چې هېڅکله باید کفري نړۍ ته اجازه ورنه کړل شي چې زمونږ د ځوانانو ذهنونه ګډود او استعدادونه غیر اسلامي وروزي.
شیخ حضرت شاه محمد بیا د افغانستان د ازادۍ او دغه لوی بدلون په اړه ټولو هېوادوالو ته مبارکي وویله او زیاته یې کړه چې د ا.ا.ا د پالیسۍ سره سم به د تحصیلي بنسټونو ستونزې او ستونزې هوارې شي. ښاغلي محمد له استادانو او کارکوونکو څخه غوښتنه وکړه چې یو بل ته لاس ورکړي او هېواد ته د مسلکي کدرونو په وړاندې کولو کې مرستې وکړي.
په پای کې کې د ښوونې او روزنې پوهنتون د اسلامي علومو پوهنځي استاد مزمل اسلامي په خپلو ویناوو کې د نوي اسلامي حکومت څخه د ملاتړ سربېره د ا.ا.ا د هېوادوالو په ګټه او خیر وباله، هغه د لوړو زده کړو وزارت له پلاوي څخه وغوښتل چې د پوهنتونونو درسونه دې پیل کړي.
