له جوزجان پوهنتون څخه د لوړو زده کړو وزارت د پلاوي لېدنه
سه شنبه، ۲۸ مرغومی ۱۴۰۰
له جوزجان پوهنتون څخه د لوړو زده کړو وزارت د پلاوي لېدنه
د لوړو زده کړو وزارت د څېړنې، تالیف او ژباړې رئیس مولوي محمد داوود حقاني په مشرۍ د لوړو زده کړو وزارت پلاوي، د علمي چارو مشاور پوهاند خاورین او د نظارت او ارزونې رئیس دوکتور محمد ولي حنیف د جوزجان پوهنتون څخه لېدنه وکړه.
د بورډ رئیس او کاري ټیم یې د پوهنتون له رئیسانو سره تر لیدنې وروسته، د جوزجان پوهنتون د علمي مجلو د څېړنیزې کمېټې له غړو او د علمي مجلو د مدیره هیئت له غړو سره بحث او د لوړو زده کړو وزارت او مرکزي څانګو د انکشافي پلانونو په اړه خبرې وکړې.
د لوړو زده کړو وزارت پلاوي د دغه پوهنتون له مشرتابه سره د ملي او نړیوالو ژورنالونو دیوان د خپرولو د څرنګوالي او د دې مجلې د خپرونو د بډایه کولو اړوند لازمې لارښوونې وکړې.
د یادولو وړ ده چې د دیوان ملي او نړیواله علمي مجله د ترکیې هېواد د حکمت ټولنیز بنسټ په مرسته او د افغان، ترکي او ازبک څېړونکو په همکارۍ په دې وروستیو کې د جوزجان پوهنتون په چوکاټ کې جوړه شوې او د ترکیې لوړو زده کړو وزارت له لوري یې د اعتبار سند هم ترلاسه کړی دی.
دغه راز د لوړو زده کړو وزارت پلاوي له پوهنځیو، څېړنیزو مرکزونو، د کیفیت د تضمین او اعتبار ورکولو، معلوماتي ټکنالوژۍ، د کارموندنې مرکز، رسنیو مرکز، د جوزجان پوهنتون له زیربناوو او همدارنګه د نارینه او ښځینه لیلیو څخه یې هم لېدنه وکړه او د ځوانانو لپاره په ښه تعلیمي چاپیریال جوړولو یې ټینګار وکړ.
