د لوړو زده کړو سرپرست وزیر په دايکندي ولايت کې يوې لويې ولسي غونډې ته وينا وکړه.
د لوړو زده کړو سرپرست وزیر شیخ الحدیث مولوي ندا محمد ندیم دایکندي ولایت ته د خپل رسمي سفر پر دوام نن یوې لویې ولسي غونډې ته وینا وکړه، چې د دایکندي والي، د علماوو شورا رئیس، د دایکندي لوړو زده کړو مؤسسې مسؤلینو، محصلینو، استادانو، د جهادي مدرسې استادانو، طلباء کرامو، قومي مخورو او عامو خلکو پکې ګډون کړی و.
د لوړو زده کړو سرپرست وزیر د اشغالګرو پر وړاندې د سپېڅلي جهاد فتحه او بریا د خلکو او اسلامي نظام ګډه لاسته راوړنه وبلله او ویې ویل، چې د اسلامي امارت نظام یو خپلواک نظام دی، په دې کې هیڅ ډول تعصب او تور او سپین ځای نلري او د شریعت نافذول، خلکو لپاره امنیت او د زده کړو برابرول د اسلامي نظام له مکلفیتونو څخه دي. نوموړي د خپلو خبرو پر دوام له محصلینو وغوښتل چې د درس او زده کړو په برخه کې زیاته هڅه وکړي، دوی د دې هېواد پر وړاندې ستر مسؤلیت لري، ځکه دوی د هېواد معنوي سرمایه ده او د بیت المال پیسې پرې مصرفیږي.
ورپسې د دایکندي والي مولوي نجیب الله رفیع دغه ولایت ته د لوړو زده کړو سرپرست وزیر له راتګ څخه خوښي څرګنده کړه او په بېلابېلو برخو کې یې یو لړ ستونزې او وړاندیزونه له سرپرست وزیر سره شریک کړل.
نېټه: دوشنبه
۱۴۴۶ هـ.ق د ربیع الثاني ۴ مه
۱۴۰۳ هـ.ش د میزان ۱۶ مه
۲۰۲۴ م د اکتوبر ۷ مه
