دلوړو زده کړو وزارت علمي معين په خپل کاري دفتر کې د اردن هېواد د التنال العربي ادارې د مجلس له رئيس سره چې څو ورځې مخکې د عربي ژبې د کورسونو د دایرولو په موخه افغانستان ته راغلى و، وکتل.
په دې کتنه کې د لوړو زده کړو وزارت علمي معین دوکتور لطف الله خیرخواه هغه ته د ښه راغلاست ترڅنګ په افغانستان کې د عربي ژبې ادبیاتو، نصاب، تدریسي میتودونو، د کتابتونونو، ساینسي څیړنو او نورو برخو د پیاوړتیا او پراختیا په اړه خبرې وکړې.
ورپسې د اردن د التنال العربي ادارې د مجلس رئیس دوکتور عبدالرووف زهدي مصطفی افغانستان ته له راتګ څخه خوښي څرګنده کړه او د عبدالله بن مسعود رضی الله عنه جامعې د محصلینو لپاره یې د عربي ژبې د کورسونو د تنظیم په برخه کې د خپلو پروګرامونو په اړه معلومات ورکړل، د لوړو زده کړو وزارت علمي معین له خوا په مطرح شویو مواردو کې یې د همکارۍ ژمنه وکړه.
د یادولو وړ ده چې تیره اونۍ د اردن هیواد د التنال العربي ادارې د مجلس رئیس دوکتور عبدالرووف زهدي مصطفی او د هغه همکاران د لوړو زده کړو وزارت په بلنه او د عبدالله بن مسعود رضي الله عنه جامعې محصلانو ته د عربي ژبې زده کولو او نورو علمي همکاريو په موخه افغانستان ته راغلي وو.
