د افغان نړیوال پوهنتون د درې پوهنځیو فوق لېسانس برنامو د تحصیلي نصاب ترتیب او چمتو کولو پنځه ورځینی کلستر په بریالیتوب سره پای ته ورسېده.
د یاد کلستر په پای غونډه کې د لوړو زده کړو وزارت سرپرست وزیر الحاج مولوي عبدالباقي حقاني، د لوړو زده کړو وزارت د تحصیلي نصاب رئیس عبدالرؤف فراهي، د لوړو زده کړو وزارت ویاند مولوي خالقداد احمد تقي، د ملي نصاب غړو، د هېواد بېلابېلو پوهنتونونو کادري غړو او استادانو ګډون کړی وو.
د غونډې په پیل کې د یاد کلستر د کاري کمېټو استازو خپل کاري راپورونه او وړاندېزونه شریک کړل.
ورپسې د ملي نصاب غړي داؤد شاه فاروقي د کلستر د کمېټو له کاره رضایت څرګند کړ او د استادانو فعالیتونه یې وستایل.
د غونډې په وروستیو برخه کې د لوړو زده کړو سرپرست وزیر الحاج مولوي عبدالباقي حقاني وینا وکړه او افغان ولس ته یې د افغان نړیوال پوهنتون د طب، انجنیرۍ او زراغت برنامو تحصیلي نصاب چمتو کېدو مبارکي وویله او د استادانو له زحمت ګاللو یې مننه وکړه.
ښاغلي حقاني دا چاره د هېواد د پرمختګ، پر ځان بسیا کېدو او نورو هېوادونو سره د سیال کېدو نوې درېڅه یاده کړه.
سرپرست وزیر زیاته کړه، د تحصیل په برخه کې د بهرنیو هېوادونو له کومې همکارۍ پرته دا نصاب افغان کادري استادانو د افغان بچیو د روزلو لپاره ترتیب او چمتو کړی دی.
د ا.ا.ا له حاکمیت وروسته د لوړو زده کړو وزارت د طب، ساینسي، فارمسي، ویترنري، کمپیوټر ساینس پوهنځیو، د تخصصاتو پنځه برنامو او تازه د افغان نړیوال پوهنتون د درې فوق لېسانس برنامو لپاره د نصاب بیا کتنه، ترتیب او د چمتو کولو چارې ترسره کړي دي.
