د لوړو زده کړو وزارت مالي او اداري معین د بلخ پوهنتون له مسوولینو سره وکتل
د لوړو زده کړو وزارت مالي او اداري معین الحاج مولوي حافظ محمد حامد حسیب بلخ ولایت ته په خپل رسمي سفر کې د بلخ پوهنتون له مسوولینو سره د لیدنې پر مهال وویل، چې د هېواد سرنوشت په پوهنتونونو پورې تړلی دی او زیاته یې کړه، چې د محصلانو په ښه روزنه کې د پوهنتون مسوولین باید یو بل ته لاس ورکړي، څو ټولنې ته د خدمت وړ اشخاص وړاندې شي.
هغه دغه راز وویل چې عالیقدر امیرالمؤمنین حفظه الله تعالی تر هر څه زیات د پوهنتونونو، استادانو او د لوړو زده کړو د کیفیت لوړونې ملاتړ کوي.
همداراز مالي او اداري معین په دغه لیدنه کې د یاد پوهنتون د بېلابېلو پوهنځیو رییسانو او استادانو ته د علومو د کیفیت په ښه والي او د نوي نسل په سالمه روزنه کې په جدي هڅو ټینګار وکړ او زیاته یې کړه: "دا چې نوی نسل تاسو ته په لاس درکړل شوی دی او پلرونه یې پر ځان هر قسم زحمت او تکلیف تېروي، د دې لپاره چې د اولاد راتلونکی یې روښانه شي، نو تاسو یې هم په روزنه کې پوره هڅې وکړئ".
د لوړو زده کړو وزارت مالي او اداري معین همدا راز د بلخ پوهنتون د مسوولینو ستونزې او وړاندیزونه هم واورېدل او د حل او پوره کېدو ډاډ یې ورکړ.
