د اقتصاد، پالیسۍ او عامه ادارې پوهنځيو د نصابونو بیا کتنې او پراختیا ملي پروګرام دویم پړاو پیل شو
د هېواد د پوهنتونو د اقتصاد، پالیسۍ او عامه ادارې پوهنځيو د نصابونو بیا کتنې او پراختیا ملي پروګرام دویم پړاو پیل شو.
د لوړو زده کړو وزارت د محصلانو چارو معین پوهندوی سید فرهاد شهیدزاده د هېواد د تحصیلي نصابونو بیا کتنې ملي پروسې د دويم پړاو پیلیدو له امله د خوښۍ اظهار وکړ او ویې ویل: "لوړو زده کړو وزارت له دوو کلونو را پدېخوا یو لړ مهم پروګرامونه د متخصص انساني ځواک د تولید لپاره پر لاره اچولي چې د هیواد د تحصيلي نصابونو بیا کتنې ملي پروسه هم یو له هغو څخه شمیرل کیږي."
د محصلانو چارو معین په لویه کچه د لوړو زده کړو وزارت پروګرامونو او فعاليتونو ته په اشارې سره وویل، چې د علمي تحقیقاتو بحث، د تقنيني اسنادو اصلاح، د تشکیلاتي جوړښتونو معقوله اصلاح، او د تحصيلي نصابونو د بیا کتنې ملي پروسه له هغو مهمو او اساسي پروګرامونو څخه دي چې له نیکمرغه په دې برخه کې ښې لاسته راوړنې لرو.
ښاغلي شهیدزاده د هیواد د ودې او انکشاف په ډګر کې د اکاډميکو بنسټونو پر بشپړ رول درلودلو ټینګار وکړ او په ډاګه یې کړه چې په کلسټرونو کې د نصاب کمېسیون استادان او غړي دې د مضمون د اهدافو، ډيپارټمنټ، پوهنځي، پوهنتون او د چاپيريال تر منځ اړیکې په داسې توګه تنظیم کړي چې دوی تر خپل منځ یو مستقیم او منطقي تړاو ولري تر څو د دولت لوی اهداف تامین او د هیواد د مختلفو برخو ستراتیژۍ په نظر کې ونیول شي.
وروسته بیا د لوړو زده کړو وزارت د علمي برنامو د پراختیا رئیس پوهنوال صدیق الله بارکزي د تحصيلي نصابونو د بیا کتنې او پراختيا پروسې په اړه خبرې وکړې او ویې ویل: "د تحصیلي نصابونو د بیا کتنې او پراختیا په جریان کې هڅه کیږي تر څو هغه مهم او اساسي مهارتونه چې د ۲۱ پیړۍ اړتیاوو ته ځواب ووایې نصاب کې ځای پر ځای شي."
د لوړو زده کړو وزارت د علمي برنامو د پراختیا د رئیس په وینا تر دې مهاله د هیواد په تحصیلي بنسټونو کې له ۱۶۵ موجودو څانګو څخه د ۴۴ څانګو نصابونه چې ۲۱ د انجنیري څانګې، ۱۰ د کرنې څانګې، ۸ د ښوونې او روزنې څانګې، ۳ د شرعياتو څانګې او ۲ د حقوقو او سیاسي علومو څانګې دي بشپړې او پايته رسیدلې دي.
همدارنګه د لوړو زده کړو وزارت د اکاډميکو چارو مشاور غلام دستګير خاورين، د لویو هیوادونو او زموږ د هیواد په علمي او اقتصادي وده کې د خوځنده او معیاري نصابونو په رول او اهمیت هر اړخیزه خبرې وکړې.
د یادونې وړ ده چې د تحصيلي نصابونو د بیاکتنې او پراختیا په ملي پروګرام کې چې ټاکل شوې ۵ ورځې به دوام ولري د لوړو زده کړو د نصاب ملي کميټې غړي، د اقتصاد، پالیسي او عامه ادارې پوهنځیو رئيسانو، د دیپارتمنتونو آمرانو او استادانو ګډون کړی دی.
