د جیولوجیستانو نړیوالې ورځې په مناسبت د کانونو ریاست او شیخ زاید پوهنتون ترمنځ د همکاریو هوکړه لیک لاسلیک شو
د جیولوجیستانو نړیوالې ورځې په مناسبت د امام ابوحنیفه (رح) د غونډو په تالار کې د ټولنیزو علومو اړوند تاریخ او جغرافیې څانګې او د خوست ولایت د کانونو ریاست سره د همکاریو هوکړه لیک لاسلیک او د یادې ورځې په اړه سیمینارونه وړاندې شول.
په سیمینار کې د پوهنتون علمي مرستیال شفیع ګل شفیقي، مالي او اداري مرستیال فیض الله فیض، د پوهنځیو رییسانو، استادانو، د کانونو رییس لایق محمد او د یاد ریاست اداري کارکوونکو او زیات شمېر محصلانو ګډون کړی و.
دغه غونډه کې علمي مرستیال شفیقي په هیواد کې د جیولوجیستانو په ارزښت او اړتیا خبرې وکړې، د افغانستان د جیولوجي په تاریخي شالید یې رڼا واچوله او زیاته یې کړه چې د افغانستان جغرافیه کې (۱۴۰۰) قیمتي منرالونه موجود دي، چې له دې جملې څخه لاجورد یې شاوخوا (۴۵۰۰) کاله پخوا د یوې قیمتي تیږې په توګه پېژندل شوي وو.
ورپسې د کانونو ریاست اړوند انجنیر وکیل خان آفتاب لهخوا (د خوست ولایت جیولوجي) ترعنوان لاندې د منرالوجي په برخه کې، د ټولنیزو علومو پوهنځي استاد نظیرګل صدیقي د ( ډبرو دوران) په برخه کې او د خوست دارالمعلمین رییس او مشر استاد سید احمد شاه خالص د (جیوکرونالوجي) په اړه پرېزېنټېشنونه وړاندې کړل.
د یادونې وړ ده چې د شیخ زاید پوهنتون رهبري د پوهنتون محصلانو د علمي ظرفیت لوړاوي په موخه ورته نور هوکړه لیکونه هم لاسلیک کړي دي.
