د عبدالله بن مسعود رضی الله عنه جامعې مسؤلینو ته (د تضمین کیفیت او اعتبار ورکولو د علمي پرګرامونو د چوکاټ) دوه ورځنی روزنیز ورکشاپ پیل شو.

یاد ورکشاپ د لوړو زده کړو وزارت د تضمین کیفیت او اعتبار ورکولو ریاست له لوري، د لوړو زده کړو وزارت علمي معین په حضور کې پیل شو. په پیل کې د دغه وزارت علمي معین دوکتور لطف الله خیرخواه د خپلې وینا پر مهال په افغانستان کې د علم او د تضمین کیفیت تاریخي قدامت او بیلګې بیان کړې.
علمي معین په اسلام کې تضمین کیفیت ته په اشارې سره وویل، چې په اسلام کې علم الرجال پخپله د تضمین کیفیت په معنی دی، چې د اشخاصو کیفیت معلوموي او دا د اسلام غوښتنه هم ده، چې هره چاره د اصولو او ځانګړو چوکاټونو په دایره کې ترسره شي.
نوموړي دغه راز د نورو علمي مرکزونو تر څنګ، دیني جامعاتو ته د ا.ا.ا د پاملرنې په اړه خوښي وښوده او ویې ویل: «د ویاړ ځای دی، چې له ډېرې مودې وروسته موږ او تاسو د دیني جامعاتو حکومتي سرپرستي وینو.»
همدارنګه د لوړو زده کړو وزارت د تضمین کیفیت او اعتبار ورکولو رئیس استاد شاکر وحیدي او د دیني تخصصاتو رئیس شیخ عبدالمالک نیازي هم د تضمین کیفیت پروسه د اداراتو او په ټوله کې د یوه علمي او تحصیلي مرکز په معیار برابرولو لپاره اړینه وبلله او زیاته یې کړه، چې په دغه دوه ورځني ورکشاپ کې به د جامعې مسؤلین د ۱۱ اصلي او ۴۹ فرعي معیارونو په اړه پوهه ترلاسه کړي او د تطبیق ساحې به یې وپېژني.
د یادونې وړده، چې د تضمین کیفیت پروسه د لوړو زده کړو وزارت اړوند په دیني جامعاتو کې په لومړي ځل پیل او تطبیق کېږي او یاد وزارت د خپلو اړوندو تحصیلي او علمي بنسټونو معیاري کولو ته ژمن دی.