د غزني پوهنتون مخکنی رییس پوهنوال محمد بایر درمل د خپلو خدمتونو له امله د لوړو زده کړو وزارت له لوري وستایل شو
د لوړو زده کړو وزارت علمي معین پوهنمل عبدالتواب بالاکرزي په غزني پوهنتون کې د پوهنوال محمد بایر درمل، د پنځه کلن ریاست پر مهال د دغه پوهنتون د پرمختګ په پار صادقانه هڅې او اخلاص وستایه او د تدریس او روزنې په برخه کې یې هغه ته د لا زیاتو بریاوو غوښتنه وکړه.
همدارنګه پوهنوال محمد بایر درمل د غزني پوهنتون د پراختیایي پروګرامونو د بریا لپاره د لوړو زده کړو وزارت له همکارۍ مننه وکړه او په بریالۍ توګه د ریاست پای ته رسولو له امله یې خوښي وښوده. دغه راز ژمنه یې وکړه چې د یوه استاد په توګه به د هېواد د بچیانو په خدمت کې هېڅ ډول هڅې ونه سپموي.
د یادولو ده چې پوهنوال درمل په غزني پوهنتون کې له ۵ کلن ریاست وروسته د ننګرهار پوهنتون په وترنرۍ پوهنځي کې د استاد په توګه وټاکل شو.
ښاغلي درمل په دغه دوره کې د غزني پوهنتون لپاره په علمي، اداري او بنسټیزو برخو کې ډېر خدمتونه کړي دي.
