د لوړو زدهکړو وزارت مالي او اداري معين کونړ ولايت ته د خپل رسمي سفر په ترڅ کې د سيد جمال الدين افغاني پوهنتون له بېلابیلو برخو څخه د ليدنې تر څنګ په یوه ستره ولسي غونډه کې ګډون وکړ.
په یاده غونډه کې د لوړو زدهکړو وزارت مالي او اداري معین مولوي حافظ محمد حامد حسیب، چې د کونړ ولایت مرستيال والي، د ياد پوهنتون مشرتابه پلاوي، د ولايتي ادارې رييسانو، د کونړ ولایت جیدو علماء کرامو، استادانو، اداري کارکوونکو او محصلينو په کې گډون کړی وو، وويل چې د ا.ا.ا مشران د باکيفيته زدهکړو لپاره د مناسب چاپېريال برابرولو په برخه کې پوره هڅې کوي او د لوړو زدهکړو وزارت ژمن دی چې د پوهنتونونو ټولې اړتياوې پر خپل وخت پوره کړي.
وروسته د کونړ مرستيال والي مولوي عبدالله حقاني وويل چې د ا.ا.ا مشران ديني او عصري زدهکړو ته ژمن دي او په دې برخه کې د پوره سهولتونو برابرولو لپاره کوښښ کوي.
همدا راز د سيد جمال الدين افغاني پوهنتون مشرتابه د خپلو خبرو پرمهال د لوړو زدهکړو وزارت د مالي او اداري معين په راتگ خوښي وښوده او په یو شمېر برخو کې یې خپلې ستونزې او غوښتنې ورسره شريکې کړې، چې مالي او اداري معین له لوري د ستونزو د حل او وړانديزونو د منلو ډاډ ورکړل شو.
