د لوړو زده کړو او پوهنې وزارتونو له لوري په ګډه د هېواد ټولو دیني مدارسو کلنۍ آزموینې، چې له تېرې شنبې ورځې پیل شوې وې، نن په بریالۍ توګه پای ته ورسېدې.
د عالیې او عالمیې مرحلې او خامسې درجې کلنۍ ازموینې د روان کال مرغومې میاشتې په ۳۰مه نېټه پیل او د شپږو ورځو په موده کې د یادو وزارتونو د رهبرۍ تر جدي څارنې لاندې، په ولایتونو کې د تحصیلي بنسټونو او پوهنې وزارت رئسانو او دیني جامعو مسؤلینو په همکارۍ په شفاف ډول پای ته ورسېدې.
د دیني علماء کرامو له ازموینو څخه د لیدنې او څارنې په موخه د لوړو زده کړو وزیر د هېواد شمال زون بلخ، جوزجان، فاریاب او سمنګان ولایتونو، د لوړو زده کړو وزارت مالي او اداري معین د هېواد جنوب لوېدیځ زون غزني، زابل اروزګان او کندهار ولایتونو او همدارنګه د دغه وزارت یو شمېر نورو مسؤلینو مختلفو ولایتونو ته سفرونه وکړل او د ازموینو جریان یې له نیږدې وڅاره.
یادې ازموینې د هېواد په ۳۴ ولایتونو کې هم مهاله پیل شوې، چې د دیني مدارسو شاوخوا ۴۸ زره طالب العلمانو او فاضلانو ګډون پکې کړی و.
