د لوړو زده کړو بنسټونو له مسوولانو سره د لوړو زده کړو وزیر ویډیو کنفرانس
د لوړو زده کړو وزیر د پوهنتونونو او لوړو زده کړو موسسو مشرانو ته د ویډیو کنفرانس له لارې د لوړو زده کړو اوونۍ بریالیتوب سره پای ته رسېدو له امله مبارکي وویله او په دې برخه کې یې د دوی له هڅو مننه وکړه.
په دې ناسته کې په داسې حال کې چې د لوړو زده کړو وزارت علمي مرستیال، د دغه وزارت د مالي او اداري معینیت سرپرست په حضوري ډول او د زدکړیالانو چارو مرستیال په مجازي ډول شتون درلود، لومړی ډاکټر عباس بصیر د تروریستي پېښو او یا هم د کرونا ویروس د خپرېدو له امله د پوهنتونونو د یو شمېر استادانو په مړینه او شهادت د لوړو زده کړو له کورنۍ سره خپله خواشیني څرګنده کړه او ویې ویل چې له نېکه مرغه د لوړو زده کړو اوونۍ چې د ولسمشرۍ د سل ورځې او سل زېري پروګرام پر بڼسټ جوړه شوې وه، د لوړو زده کړو په تحصیلي بڼسټونو کې د بېلابېلو پروژو په پرانیستلو سره په بریالیتوب سره پای ته ورسېدې.
هغه د دې ترڅنګ چې د دې بریا مبارکي یې د هېواد تحصیلي بنسټونو ته ورکړه ویې ویل چې له نېکه مرغه د هېواد ولسمشر د دغه وزارت د مشرتابه پلاوي سره په کتنه کې د دې لارښوونه ورکړه چې په راتلونکو دوه کلونو کې د لوړو زده کړو سکټور ټولې اړینې زیربناوې بشپړ او په دې بڼسټونو کې د اوبو رسونې او برېښنا پروژو بشپړېدل به هم په پام کې ونیول شي.
د لوړو زده کړو وزیر د لوړو زده کړو له بنسټونو وغوښتل چې د ولسمشر د لارښوونو پلي کولو لپاره او همدارنګه د لوړو زده کړو وزارت د پروګرامونو د پلي کولو لپاره همکاري وکړي چې علمي څېړنې، د تحصیلي نصاب پراختیا، بورسونه، د ماسټرۍ پروګرامونه رامنځته کول، غوره امنیتي تدابیر او زدکړیالانو خدمتونه پکې شامل دي.
هغه زیاته کړه چې د زدکړیالانو د خدمتونو په برخه کې هغه څه چې تمه کېږي باید ترسره شي او هغه د حل لارې چې په دې برخه کې لري د تېرو وختونو په پرتله به توپیر ولري.
