د لوړو زده کړو سرپرست او نوماند وزير د اراکوزيا خصوصي پوهنتون د طبي څانګې له محصلینو سره ولیدل
د لوړو زده کړو سرپرست او نوماند وزير نن د هلمند ولایت د اراکوزيا خصوصي پوهنتون د طبي څانګې له محصلينو سره ژمنه وکړه چې د دوو اونیو په جريان کې به يې ستونزې اوارې شي.
اراکوزيا خصوصي پوهنتون د هغو شپږو خصوصي تحصيلي بنسټونو په ډله کې دی چې د لوړو زده کړو او عامې روغتیا وزارتونو له ارزونې او د کابينې له پرېکړې وروسته يې د طب پوهنځي لغوه شول.
په هغه غونډه کې چې د لوړو زده کړو وزارت په تالار کې جوړه شوه، د محصلينو چارو او مالي او اداري معینانو، د خصوصي لوړو زده کړو بنسټونو د محصلينو چارو رييس او په ولسي جرګه د خلکو استازي غلام ولي افغان حضور درلود، لومړی د اراکوزيا پوهنتون مسولينو او د دې پوهنتون څو تنو محصلينو خبرې وکړې، خپلې ستونزې او غوښتنې يې د لوړو زده کړو له رهبري سره شريکې کړې.
په دې غونډه کې د خبرو محور د محصلينو فراغت چې وروستی کال يې دی، نورو پوهنتونونو ته د محصلينو تبديلي او په لوړو زده کړو وزارت کې د محصلينو د شموليت د اساس اصلاح کول وو.
د لوړو زده کړو نوماند او سرپرست وزیر دوکتور عباس بصير د اراکوزيا پوهنتون د محصلينو او مسولينو د غوښتنو له اورېدو وروسته او همداراز په دې برخه کې د لوړو زده کړو وزارت د کړنو په اړه د محصلانو چارو د معین پوهندوی سيد فرهاد شهيد زاده د توضيحاتو تر اوریدو وروسته ژمنه ورکړه چې د دې طبي پوهنتون د وروستي کال د محصلينو د فراغت مسئله ژر اواره کړي. نوموړي همداراز د اراکوزيا تحصيلي مؤسسې له مسئولينو وغوښتل چې د محصيلنو د تبديلي حق له قانون سره سم رعايت کړي، همدازار يې ژمنه وکړه چې د خصوصي تحصيلي مؤسسو د ستونزو د اواري لپاره په دې برخه کې د لوړو زده کړو وزارت ته د وړاندې شوو طرحو په پام کې نيولو سره هڅه کوي.
