د لوړو زده کړو سرپرست وزیر او ورسره مل پلاوي ترکیې ته د خپل رسمي سفر پر مهال په جلا جلا لیدنو کې د مولانا جلال الدین
۱۴۴۳/۱۱/۱۹
۱۴۰۱/۳/۲۹
د لوړو زده کړو سرپرست وزیر او ورسره مل پلاوي ترکیې ته د خپل رسمي سفر پر مهال په جلا جلا لیدنو کې د مولانا جلال الدین محمد بلخي او شمس تبریزي له مدرسو او همداراز د قونیې ښار دیني تخصصاتو له مرکز څخه لیدنه وکړه.
د لوړو زده کړو سرپرست وزیر الحاج مولوي عبدالباقي حقاني د مولانا جلال الدین محمد بلخي او شمس تبریزي د مدارسو له مدرسینو، زده کوونکو، کتابتونونو او چاپېریال څخه د لیدنې تر څنګ، د یادو مدرسو له مسؤلینو سره د افغانستان او ترکیې د ګډو کلتوري ارزښتونو په اړه خبرې وکړې.
همدارنګه نوموړي د قونیې ښار د دیني تخصصاتو مرکز له مسؤلینو، استادانو او کتابتون څخه د لیدنې سربېره په دغه ښار کې له هغو افغان محصلینو سره هم وکتل، چې د دغه ښار په مختلفو تحصیلي مرکزونو کې په دیني زده کړو بوخت دي.
همداراز د لوړو زده کړو سرپرست وزیر د دغه سفر په جریان کې د ترکیې هېواد د زراعتي پوهنتون له مختلفو فارمونو څخه د لیدنې پر مهال، په دغه برخه کې د هغوی کار ولید او تجربې یې واورېدې. نوموړي په علمي، څېړنیزو، اقتصادي او کرنیزو برخو کې د یاد هېواد له پوهنتونونو او علمي مرکزونو څخه د همکارۍ غوښتنه وکړه.
