د لوړو زده کړو سرپرست وزیر جنوب ختیځ زون ته د خپل کاري سفر په ترڅ کې د دغه زون علماء کرامو، د تحصیلي بنسټونو مشرتابه پلاوي، استادانو، محصلینو او مخورو شخصیتونو سره د خوست ولایت مقام کې ناسته وکړه.
د لوړو زده کړو سرپرست وزیر شیخ الحدیث مولوي نداء محمد ندیم صاحب، د خوست ولايت والي، والی مرستيال، د خوست شیخ زاید، لوګر، پکتیا او پکتیکا تحصیلي بنسټونو له مشرتابه پلاوي، استادانو، محصلینو او د یادو ولایتونو له علماء کرامو او مخورو ولسي شخصیتونو سره په ناسته کې د یاد زون د ځوان نسل پر سالمې روزنې ټینګار وکړ او له هغوی څخه یې وغوښتل چې د علم د پرمختګ او اسلامي نظام د ټینګښت په برخه کې خپلې مشورې ورسره شریکې کړي.
همدارنګه په یاده ناسته کې د لوړو زده کړو سرپرست وزیر له علماء کرامو وغوښتل چې د اسلام د دښمنانو د دسیسو شنډولو په برخه کې له خپل نظام سره همکاري وکړي او زیاته یې کړه چې موږ د ژوند په هره برخه کې علماء کرامو ته اړتیا لرو.
د لوړو زده کړو سرپرست وزیر شیخ الحدیث مولوي نداء محمد ندیم صاحب په هېواد کې د پاته شویو استادانو نېک احساس او وطنپالنه وستایله او هغوی ته یې ډاډ ورکړ چې نظام به یې ستونزې حل او د تدریس لپاره به زمینه ورته برابره کړي.
همدا راز د لوړو زده کړو سرپرست وزیر د ا.ا.ا د پالیسیو پر عملي کولو د ټینګار تر څنګ، علماء کرام، استادان او محصلین د نظام ملاتړ ته راوبلل او ترې ویې غوښتل چې د خپل نظام د ټینګښت لپاره صادقانه کار وکړي.
همداراز په یاده غونډه کې خوست،لوګر،پکتیا،پکتیکا ولايتونو په نمايندګي علماء کرامو هم خپلی مشورې او وړانديزونه وزیر صاحب ته وړاندې کړل.
نېټه: دوشنبه
۱۴۴۴/۵/۱۸هـ.ق ۱۴۰۱/۹/۲۱.ش ۲۰۲۲/۱۲/۱۲م
