د لوړو زده کړو سرپرست وزیر د عامې روغتیا وزارت اړوند تخصصي روغتونونو د ۳۰۰ متخصصینو په فراغتغونډه کې ګډون او وینا وکړه. 

په همدې مناسبت فراغتغونډه کې د ریاست الوزاء سیاسي او اداري مرستیالانو، د عامې روغتیا وزارت مشرتابه پلاوي، د کابینې غړو، متخصصینو او د متخصصینو د کورنیو غړو ګډون کړی و. 
د ریاست الوزرا سیاسي مرستیال مولوي عبدالکبیر وویل چې د افغانستان په لرې پرتو سیمو کې خلک له روغتیایي ستونزو سره مخ دي. نوموړي د روغتیا نړیوال سازمان څخه وغوښتل چې په روغتیایي سکتور کې له افغانستان سره مرسته وکړي. 
دغه راز د ریاست الوزراء اداري مرستیال مولوي عبدالسلام حنفي وویل چې د جګړو له امله د افغانستان د نورو برخو تر څنګ روغتیایي سکتور هم زیانمن شوی. هغه زیاته کړه: «د عامې روغتیا وزارت مکلف دی چې د بې کیفیته درملو وارداتو او په هېواد کې یې د جوړولو مخه ونیسي، د متخصصینو د روزنې لپاره معیاري نصاب جوړ کړي او دغه برخه تجهیز کړي.» 
همدارنګه د لوړو زده کړو سرپرست وزیر شیخ الحدیث مولوي نداء محمد ندیم وویل چې په عصري علومو کې طب تر ټولو غوره او مهم مسلک دی. نوموړي له فارغو شویو متخصصینو څخه وغوښتل چې په خپل مسلک کې اسلامي احکام او اخلاق مراعات کړي او ورته ویې ویل: «پر تاسو د دې ملت لګښت شوی، حق درباندې لري چې خدمت یې وکړئ او د مادیاتو په نسبت ترجیح ورکړئ.» 
د یادونې وړ ده چې د غونډې په پای کې د ا.ا.ا مشرانو له لوري فارغو شویو متخصصینو ته تصدیق پاڼې او ډالۍ ورکړل شوې. 
نېټه: پنجشنبه
۱۴۴۶هـ.ق، د ربیع الال ۲مه
۱۴۰۳هـ.ش، د سنبلې ۱۵مه
۲۰۲۴م، د سپټمبر ۵مه