د لوړو زده کړو سرپرست وزیر سره د افغانستان لپاره د مالیزیا د بهرنیو چارو ځانګړي استازي ناسته ترسره کړه

سه شنبه، ۱۴۰۰ کب ۳ مه
د لوړو زده کړو سرپرست وزیر سره د افغانستان لپاره د مالیزیا د بهرنیو چارو ځانګړي استازي ناسته ترسره کړه.
په دې ناسته کې د لوړو زده کړو سرپرست وزیر مولوي عبدالباقي حقاني، علمي معین دوکتور لطف الله خیرخواه، سید اسماعیل روحاني او د افغانستان لپاره د مالیزیا د بهرنیو چارو ځانګړي استازي احمد عظم، چې د مالیزیا هېواد بېلابېلو ادارو استازو یې ملتیا کوله ګډون درلود.
په یاد ناسته کې د لوړو زده کړو سرپرست وزیر د افغانستان پر تحصیلي بنسټونو او ستونزو رڼا واچوله او ويې ویل، چې له جګړو راوتلی افغانستان یو ځل بیا ابادولو او پرمختګ ته اړتیا لري، چې دا چاره په زده کړو سره ترسره کېدای شي.
ښاغلي حقاني د مالیزیا هېواد له کړو همکاریو مننه وکړه او د ځوان نسل د روزنې، د استادانو ظرفیت لوړونې، زده کړیالانو ته د سکالر شیپونو زمینې برابرونې، د انلاین زده کړو لپاره محصلینو ته د انټرنیټ اسانتیاوې برابرولو او ورته نورو همکاریو غوښتنه وکړه.
دغه راز محترم مولوي عبدالباقي حقاني د افغان نړیوال پوهنتون په کامیابولو، مالیزیا ته د یوه هیئت د ورتګ او د ننګرهار اسلامي پوهنتون په فعالولو برخو کې ځيني وړاندېزونه وکړل.
بلخوا بیا د افغانستان لپاره د مالیزیا د بهرنیو چارو ځانګړي استازي احمد عظم د افغانستان پر ازادۍ او تحصیلي بنسټونو شروع کېدو خوښي څرګنده کړه او زده کړې یې د یوه داسې هېواد لپار چې جنګونو ځپلی وي، مهمې وګڼلې.
ښاغلي عظم دغه راز وویل، مالیزیا هېواد له افغانستان سره په هره برخه کې همکاریو ته چمتو دی، چې ژر به په تحصیلي، بشري، صحي او بېلابېلو برخو کې همکاري وکړي.
همدارنګه نوموړي زیاته کړه چې، افغانستان ته زمونږ د راتګ یوه موخه همدا ده چې اولیتونه په نښه او بیا همکاریو ته دوام ورکړو.
دغه راز په یاده ناسته کې د مالیزیا هېواد د بخاري پوهنتون له لوري افغان زده کړیالانو ته د ۱۰۰ بورسونو د ورکړې ژمنه هم وشوه.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
.