د لوړو زده کړو سرپرست وزیر سره د یونسکو رئیسې، د یوناما سیاسي مرستیالې او ورسره پلاوي لېدنه ترسره کړه
پنجشنبه، ۵/۹/۱۴۴۳
د لوړو زده کړو سرپرست وزیر سره د یونسکو رئیسې، د یوناما سیاسي مرستیالې او ورسره پلاوي لېدنه ترسره کړه!
په دې ناسته کې د لوړو زده کړو سرپرست وزیر مولوي عبدالباقي حقاني، د یونسکو نړیوالې ادارې رئیسې پتریشا، د یوناما سیاسي مرستیالې کندیسن او ورسره پلاوي ګډون کړی وو.
په یاده ناسته کې د لوړو زده کړو سرپرست وزیر مولوي عبدالباقي حقاني د محصلینو پرمخ د پوهنتونو د پرانېستلو او په تحصیلي برخو کې پر موجوده ننګونو خبرې وکړې او د تحصیلي برخې د تقویت او دوامداره ساتلو په برخه کې یې ترې د همکارۍ غوښتنه وکړه.
ښاغلي حقاني دغه راز وویل: " موږ غواړو چې هر افغان بچی تحصیل وکړي او په همدې موخه مو اوس په کمو امکاناتو تحصیلي لړۍ جاري ساتلې ده."
سرپرست وزیر زیاته کړه، موږ نن سبا د پوهنتونو استادانو ته د معاش ورکړې، د محصلینو د لیلې مصارفو او د محصلینو ترانسپورت په برخو کې له ستونزو سره مخ یوو، چې د نړیوالې ټولنې توجو ورته غواړو، ترڅو مو تحصیلي بنسټونه لا قوي شي.
بل لورته د یونسکو نړیوالې ادارې رئیسې پتریشا د لوړو زده کړو له سرپرست وزیر څخه دوی ته له وخت ورکولو د مننې ترڅنګ وویل، موږ د افغانستان د تحصیلي او تعلیمي برخو ستونزې درک کوو او هڅه کوو چې نړیوالو ته په دې برخه کې قناعت ورکړو، ترڅو همکاري وکړي او افغان محصلین په مساویانه توګه زده کړې ترسره کړي.
