د لوړو زده کړو سرپرست وزیر له لوري د ۱۱۵ میلیونه افغانیو په لګښت د کندهار پوهنتون تدریسي روغتون او لیلیې ودانیو نیمه کاره پروژو کار پیل شو.
د لوړو زده کړو سرپرست وزیر شیخ الحدیث مولوي نداء محمد ندیم صاحب او ورسره مل پلاوي د هېواد جنوب لوېدیځ زون ته په خپل رسمي سفر کې د کندهار پوهنتون تدریسي روغتون او لیلیې ودانیو د نیمه کاره پروژو چارې پیل او مسؤلینو ته یې په معیاري ډول د تکمیل امر وکړ.
دغه راز د لوړو زده کړو سرپرست وزیر په همدې مناسبت جوړې شوې غونډه کې وویل چې د ا.ا.ا او په ځانګړي ډول لوړو زده کړو وزارت په هېواد کې د لوړو زده کړو پیاوړتیا ته ژمن دی او زیاته یې کړه: «د لوړو زده کړو وزارت په غوښتنه او د ریاست الوزاء په منظورۍ له دې وروسته په هېواد کې دننه د امارتي پوهنتونونو په ماسټري او دوکتوراء بوختو استادانو فیسونه د لوړو زده کړو وزارت له بودیجې ورکول کېږي.»
همدارنګه په یاده غونډه کې د کندهار پوهنتون رئېس مولوي اکرم شاه عاصم د لوړو زده کړو وزارت له مشرتابه څخه ځانګړې مننه وکړه، چي تل یې د ستونزو د حل هڅه کړې او د هېواد د لوړو زده کړو پیاوړتیا لپاره یې نه ستړې کېدونکې مبارزه کړې ده.
د یادونې وړ ده چې د امیرالمؤمنین حفظه الله د ځانګړي هدایت پر بنسټ به د ۲۱۸ میلیونه افغانیو په ارزښت د کندهار پوهنتون، نیمروز او زابل لوړو زده کړو مؤسسو د نیمه بشپړو پروژو کار پیل او تکمیل شي.
