د لوړو زده کړو سرپرست وزیر مولوي عبدالباقي حقاني د کابل طبي پوهنتون استاد او د اعصابو جراحانو اتحادیې رئیس پوهاند دوکتور احمد فواد پېرزاد سره د نوموړي په کور کې وکتل

۱۴۰۰کال، د کب ۱
د لوړو زده کړو سرپرست وزیر مولوي عبدالباقي حقاني د کابل طبي پوهنتون استاد او د اعصابو جراحانو اتحادیې رئیس پوهاند دوکتور احمد فواد پېرزاد سره د نوموړي په کور کې وکتل.  
په دې لېدنه کې د لوړو زده کړو سرپرست وزیر مولوي عبدالباقي حقاني چې د علي اباد تدریسي روغتون رئیس ډاکټر عماد الدین ځاځي یې ملتیا کوله، د پوهاند دوکتور احمد فواد پېرزاد په لېدو او د اختطاف کوونکو له منګولو پر ازادېدو د خوښۍ د څرګندلو ترڅنګ وویل؛ ځیني کړۍ شته چې لا هم د خلکو د اذهانو خرابولو لپاره کار کوي، خو د ا،ا،ا په ټول توان هڅه کوي چې د داسې علمي کادرونو د سر او مال ساتنه وکړي.
د لوړو زده کړو سرپرست وزیر د محترم دوکتور پېرزاد کړنې او فعالیتونه وستایل او ویې ویل، چې هېواد مو په کار پوه او مسلکي ډاکټرانو، انجینرانو او استادانو ته اړتیا لري او دوی باید د نورو تر اغېز لاندې رانشي او باید له هېواده ونه وځي. 
همدارنګه د کابل طبي علومو پوهنتون استاد او د اعصابو جراحانو اتحادیې رئیس پوهاند دوکتور احمد فواد پېرزاد د لوړو زده کړو سرپرست وزیر له ورتګ او په خلاصون کې یې د پوره همکارۍ له امله  مننه وکړه.
نوموړي وویل چې د ا،ا،ا او د لوړو زده کړو وزارت رهبرۍ دا وښودله چې دوی د هېواد د کادرونو پوره خیال ساتي او قدر یې کوي.
ښاغلي پیرزاد دغه راز وویل، چې په خپل ټول توان به د تېر په څېر په خپل هېواد کې خپلو خلکو ته په دوامداره توګه خدمت کوي او له نورو علمي کادرونو یې غواړم چې په دې حالاتو کې تر پخوا لا ډېر خپلو هېوادوالو ته خدمت وکړي.