د لوړو زده کړو سرپرست وزیر ننګرهار ولایت ته د خپل کاري سفر په ترڅ کې د ختیځ زون د دولتي او خصوصي تحصیلي بنسټونو له محصلینو سره ناسته وکړه.
د لوړو زده کړو سرپرست وزیر شیخ الحدیث مولوي نداء محمد ندیم صاحب د یاد زون له محصلینو سره په ناسته کې هغوی یووالي ته راووبلل او ترې ویې غوښتل چې د خپل مسلک او پوهې له لارې خپل هېواد او خلکو ته خدمت وکړي. نوموړي محصلینو ته په خطاب کې وویل چې د هېواد راتلونکی جوړول او د بهرنیانو له احتیاج څخه یې رایستل ستاسو مسؤلیت دی او د دې مسؤلیت د اداء کولو لپاره په خپلو درسونو کې هڅو ته اړتیا ده.
همدارنګه د لوړو زده کړو سرپرست وزیر محصلین د غرب فکري جګړې او دسیسو ته متوجه کړل او له هغوی څخه یې وغوښتل چې د خپل نظام د ټینګښت لپاره کار وکړي او د پردیو د دسیسو ښکار نه شي. دغه راز له محصلینو یې وغوښتل چې د غرب د تبلیغاتي جکړې پر وړاندې په مبارزه کې له خپلو ټولنیزو رسنیو کار واخلي او هغوی پرېنږدي چې خپلو شومو موخو ته ورسیږي.
د لوړو زده کړو سرپرست وزیر شیخ الحدیث مولوي نداء محمد ندیم صاحب ډاډ ورکړ، چې په خپل ټول توان سره به د محصلینو او استادانو د ستونزو د حل هڅه کوي او له شته امکاناتو په استفادې به د غوره درسي چاپېریال زمینه ورته برابره کړي.
نېټه: چهار شنبه
۱۴۴۴/۵/۱۳هـ.ق ۱۴۰۱/۹/۱۶.ش ۲۰۲۲/۱۲/۷م
د لوړو زده کړو وزارت مطبوعاتي دفتر
