د لوړو زده کړو سرپرست وزیر په خپل کاري دفتر کې د ملي پراختیا شرکت له عمومي اجرائیوي رئیس سره، د دغه وزارت اړوند نیمه کاره پروژو د تکمیل په موخه وکتل.
د لوړو زده کړو سرپرست وزیر شیخ الحدیث مولوي نداء محمد ندیم صاحب د ملي پراختیا شرکت د فعالیتونو د ستایلو تر څنګ، د مرکزي او ولایتي امارتي تحصیلي بنسټونو او د دې وزارت اړوندو نورو پروژو د تکمیل په اړه تخنیکي بحث وکړ.
د یادې لیدنې پر مهال د لوړو زده کړو سرپرست وزیر په پوهنتونونو کې د لیلیو، تدریسي بلاکونو او نورو برخو د نیمه کاره پروژو پر تکمیل ټینګار وکړ، تر څو د محصلینو او استادانو لپاره لازمې اسانتیاوې رامنځته شي.
همدارنګه د ملي پراختیا شرکت عمومي اجرائیوي رئیس عبدالرحمن عطاش د لوړو زده کړو وزارت اړوندو پروژو تکمیلولو ته تیاری وښود او ډاډ یې ورکړ چې د ملي پراخیتا شرکت به په پوره صداقت سره د لوړو زده کړو وزارت اړوندو پروژو کې کار وکړي.
