د لوړو زده کړو سرپرست وزیر په شتون کې د (پروان، بامیان، پنجشېر او دایکندي) تحصیلي بنسټونو د اسلامي ثقافت کادري بستونو لپاره د نویو ګمارل کېدونکو استادانو څخه تقریري ازموینه (انټروي) واخیستل شوه.
د ازموینې په پیل کې د لوړو زده کړو سرپرست وزیر شیخ الحدیث مولوي نداء محمد ندیم صاحب ټول علماء کرام په دیني او اخروي چارو کې بریالي وبلل او یادونه یې وکړه، چې په دغه پروسه کې یې د ګډون موخه د ازموینې لا شفافیت او د غوره کادرونو رابرسېره کول دي.
د یادو تحصیلي بنسټونو ۱۵ کادري بستونو ته د جذب په موخه له ۸۳ داوطلبانو څخه د تحریري ازموینې وروسته تقریري ازموینه د لوړو زده کړو سرپرست وزیر په شتون کې د ازموینې لپاره ټاکل شوې کمېټې له لوري د کابل پوهنتون د رهبري شورا په تالار کې واخیستل شوه، چې د بهرنۍ ژبې، تحریري او تقریري ازموینې له پایلو وروسته به وړ او مستعد داوطلبان د علمي کادري غړو د جذب لایحې له مخې د علمي کنفرانسونو پروسې ته معرفي شي.
