د لوړو زده کړو سرپرست وزیر په مشرۍ د خصوصي تحصیلي بنسټونو د عالي کمیسیون نوبتي غونډه ترسره شوه.
په یاده ناسته کې د لوړو زده کړو وزارت علمي، مالي او اداري او د محصلانو چارو معین صاحبانو، او د ياد وزارت حقوقي سلاکار ،د مرکزي ادارو یو شمېر رئیسانو، د مرکزي دولتي پوهنتونونو رئیسانو او د خصوصي تحصیلي بنسټونو د اتحادیې اجرایوي مشر ګډون درلود.
په پیل کې د لوړو زده کړو سرپرست وزیر شیخ الحدیث مولوي نداء محمد ندیم صاحب، په خصوصي تحصیلي بنسټونو کې د ستونزو د حل لپاره د دې کمیسیون ناستې اړینې وبللې او زیاته یې کړه چې له خلکو سره د اسانۍ تر څنګ، باید د هېواد د تحصیلي نظام کیفیت ته هم پام وساتو.
دغه راز د لوړو زده کړو سرپرست وزیر وویل: «موږ عدالت ته ژمن یو او د لوړو زده کړو په نظام کې هېڅ ډول فساد نه شو منلی.» نوموړي د تحصیل د پرمختګ او معیاري کولو لپاره په تحصیلي برخو کې د وړ او متخصصو کادرونو پر ګومارنې او له تحصیلي بنسټونو څخه پر جدي څارنې ټينګار وکړ.
وروسته له اجنډا سره سم د کمیسیون د غړو له لوري د خصوصي تحصیلي بنسټونو د مرکزي څانګې سربېره د نورو څانګو د څرنګوالي، د ځینو پوهنځیو او څانګو د نومونو پر مشخص کولو، له یوه ځای څخه بل ځای ته د خصوصي تحصیلي بنسټونو د نقل مکان او د نقل مکان د شرایطو پوره کولو او همدارنګه د خصوصي تحصیلي بنسټونو د اقتصادي ستونزو په اړه هر اړخیز بحثونه وشول.
همدارنګه د ځينو خصوصي پوهنتونونو له لوري د امناء رالېږل شوی هیئت تایید او نورو پوهنتونونو ته هم سپارښتنه وشوه، چې خپل امناء هئیت لوړو زده کړو وزارت ته ورمعرفي کړي.
دغه راز د الفلاح خصوصي پوهنتون، چې د تضمین کیفیت درې پړاوونه یې تکمیل کړي او د کمپیوټر ساینس پوهنځۍ او همدارنګه د انجنیري پوهنځي تر چتر لاندې د (اوبو زېرمو او چاپېریال ساتنې) ډیپارټمنټ پر غوښتنه بحث وشو او تصمیم ونیول شو چې د ټولو شرایطو له پوره کولو وروسته دې منظوري طی مراحل شي.
د یادولو وړ ده چې د خصوصي تحصیلي بنسټونو عالي کمیسیون، د یادو بنسټونو د پرمختګ، معیاري کولو، د ستونزو د حل او د کارونو د چټکتیا په موخه ایجاد شوی دی.
