د لوړو زده کړو علمي معين د اوبو د علم په برخه کې د يونسکو له مسئولانو سره وکتل

د لوړو زده کړو وزارت علمي معین د اوبو د علومو په برخه کې د یونسکو د مسوولينو او افغانستان کې د اوبو مدیریت او تنظیم مسوولینو په ګډه غونډه کې ګډون وکړ او د افغانستان د اوبو مدیریت په څرنګوالي یې د لوړو زده کړو وزارت پر رول خبرې وکړې.

په دغه ویډیويي غونډه کې د افغانستان د اوبو او چاپېریال ملي څېړنیز مرکز رییس ښاغلي ډاکټر وسیم اقبال، د بهرنیو اړیکو او بورسیو د تنظیم، څېړنې، ژباړې او تالیف د مرکز رييسانو، د اوبو د تنظيم او چاپېريال ساتنې د ملي ادارو رييسانو او په کابل کې د يونسکو استازي هم حضور لاره. دغه غونډه په پاريس کې د افغانستان د سفير او يونسکو کې د افغانستان د دایمي استازي ښاغلي همایون عزیزي په همغږۍ جوړه شوې وه او موخه یې د اوبو د مديریت په برخه کې د هغو ستونزو اوارول وو چې افغانستان اوس ‌مهال ورسره مخ دی.

د خپرونې په لړ کې لومړی یونسکو کې د هایدرولوژیکو نړیوالو پروګرامونو مدیر ښاغلي ابو اماني د اقلیمي بدلون په عمومي وضعیت او د پاکو اوبو په سرچینو یې د اغېز په اړه پرزېنټېشن وړاندې کړ او د دې ستونزې د حل له پاره یې د یونسکو سازمان او هېوادونو په ګډه همکارۍ رڼا واچوله.

وروسته یونسکو کې د افغانستان دایمي استازي ښاغلي همایون عزیزي او څو نورو اړوندو متخصصینو په هر اړخیز ډول د اقلیمي بدلون، د چاپېریال برخه کې شته ستونزو او افغانستان کې د پاکو اوبو د مدیریت په برخه کې پر ستونزو خبرې وکړې.

د لوړو زده کړو وزارت علمي معین پوهنمل عبدالتواب بالاکرزي د دې غونډې د جوړولو له امله په پاريس کې د افغانستان د سفير همايون عزيزي له هڅو مننه وکړه. همداراز يې د لوړو زده کړو وزارت د فعالیتونو له کبله چې د اوبو او چاپېريال ساتنې په اړه يې کړې دي خبرې وکړې. د اوبو او ژوندانه چاپېریال د دې مرکز جوړول يې په دې برخه کې يوه مهمه لاسته راوړنه وبلله چې د علمي څېړنو او د وړ او عملي کړنو د ترسره کولو له پاره به د افغانستان د اوبو له سرچينو اغېزمنه ګټه اخلي.

پوهنمل عبدالتواب بالاکرزي افغانستان کې د ځمکې لاندې او سطحي اوبو د ارقامو په وړاندې کولو سره، د یادو اوبو د مدیریت په برخه کې په ستونزو، فرصتونو او امکاناتو خبرې وکړې او په دې برخه کې يې د مناسبو کړنلارو د عملي کولو په تړاو د یونسکو د همکارۍ غوښتنه وکړه.

همداراز د اوبو او چاپېریال ملي څېړنیز مرکز رییس ډاکټر وسیم اقبال هم د یاد مرکز جوړښت، فعالیت او لاسته راوړنو په اړه مالومات ورکړل او د یاد مرکز په کاري برخه کې یې ځینې وړاندیزونه او نظریات وړاندې کړل.

په دغه غونډه کې د لوړو زده کړو وزارت له لوري وړاندیز وشو چې د اوبو او چاپېریال ملي څېړنیز مرکز په یونسکو کې د دویمې کټګورۍ په توګه ومنل شي او د IHP کمېټې علمي کادر اړوند Chair یا د یونسکو اړوندو اوبو برخو کې د ځای درلودل په پام کې ونیول شي.

همداراز د اوبو اړوندو څانګو کې یې د ماسټرۍ او دوکتورا په کچه د علمي کادر د ظرفیت لوړولو، د اړوندو برخو څانګو بیاکتنې او د علمي کادر غړو له پاره د لنډمهاله کورسونو جوړولو په موخه د یونسکو د همکارۍ غوښتنه وکړه.

د یادې ناستې په پای کې له اړوندو ادارو غوښتنه وشوه چې د اوبو د لاښه مدیریت څرنګوالي په اړه خپل وړاندیزونه او پروپوزلونه له یونسکو سره شریک کړي.