د لوړو زده کړو وزارت اداري کارکوونکو ته د ساده شویو پروسو پلي کول د ستاینلیکونو په ورکولو سره پای وموند
په لوړو زده کړو وزارت کې د اداري اصلاحاتو او ملکي خدمتونو ادارې لخوا د ساده شویو پروسو روزنیز ورکشاپ پای ته ورسید او د پلي کولو پروسه يې پیل شوه. د یاد ورکشاپ په تنظیم او پرمخ وړلو کې دخیلو کارکوونکو ته د لوړو زده کړو وزارت له لوري ستاینلیکونه وویشل شول.
د غونډې په پیل کې د لوړو زده کړو وزارت مالي او اداري معین مولوي حافظ محمد حامد حسیب وویل، چې دا ډول ورکشاپونه په وزارتونو او ادارو کې د شفافیت رامنځته کولو لامل ګرځي، هغه زیاته کړه چې په اسلام کې هم د خلکو د خدمت لپاره اسانه او ساده لاره غوره شوې ده.
وروسته د ملکي خدمتونو او اداري اصلاحاتو عمومي رئیس مولوي عبدالحنان عارف الله وویل، چې د خلکو د کارونو چټکتیا او خدمت لپاره دا پروسه په لاره اچول شوې وه چې اوس يې د پلي کولو وخت دی.
د یادولو وړ ده، چې په پای کې د وزارت د مسؤلینو لخوا د ورکشاپ تنظیمونکو ته ستاینلیکونه وویشل شول
