د لوړو زده کړو وزارت او امارتي تحصیلي بنسټونو ګډه رهبري شورا ناسته د دغه وزارت سرپرست وزیر شیخ الحدیث مولوي نداء محمد ندیم په مشرۍ ترسره شوه.
د یادې ځانګړې رهبري شورا موخه د استادانو او محصلینو د ستونزو حل او سیرت او صورت برابرول، د تحصیلي نصاب بیاکتنه او نیمګړتیاوو په نښه کول، د مراسلاتو عاجله رسونه او ورته رسېدنه او په دې برخه کې د ابهاماتو له منځه وړل، له لابراتوارونو څخه د محصلینو په عملي زده کړو کې ګټه اخیستنه، د پوهنتونونو مشرتابه پلاوي تر منځ، د پوهنتونونو او مرکزي ادارو او له ولایتي ادارې سره د ښې همغږۍ رامنځ ته کول و.
د ناستې په پرانیسته کې د لوړو زده کړو سرپرست وزیر شیخ الدحدیث مولوي نداء محمد ندیم یاده شورا ډېره مهمه وبلله او ویې ویل چې په دې شورا کې د افغانستان ټولو امارتي پوهنتونونو، دیني جامعاتو او مرکزي ادارو رئيس صاحبان ګډون لري. نوموړي زیاته کړه: «اسلام د امیر او مسؤلینو تر منځ پر مشوره کولو ټينګار کړی، پر همدې اساس مو دا ګډه شورا جوړه کړه، تر څو په ګډه او له نیږدې پر مسایلو بحث وکړو.»
دغه راز نوموړي وویل چې موږ د الله تعالی په سخت امتحان کې یو او په دې امتحان کې د کامیابۍ یوازینۍ لار دا ده چې د هېواد تحصیلي نظام په پښو ودروو او په خپله برخه کې نه ستړي کېدونکي خدمتونه وکړو.
همدارنګه د لوړو زده کړو سرپرست وزیر د امارتي تحصیلي بنسټونو یو شمېر ستونزې او نیمګړتیاوې د پوهنتونونو له رئیس صاحبانو سره شریکې کړې او د حل غوښتنه یې ترې وکړه.
دغه راز د لوړو زده کړو وزارت علمي معین دوکتور لطف الله خیرخواه او مالي او اداري معین مولوي حافط محمد حامد حسیب په خپلو خبرو کې د تحصیلي بنسټونو پر پرمختګ ټینګار وکړ او ویې ویل چې موږ ته د هېواد د تحصیلي ډګر مسؤلیت راسپارل شوی، چې باید په ښه ډول یې ادا کړو.
وروسته له اجنډا سره سم د مرکزي ادارو د رئیس صاحبانو له لوري د تحصیلي بنسټونو اړوند موضوعاتو او ستونزو ته اشاره وشوه او ورپسې د امارتي تحصیلي بنسټونو رئیس صاحبانو له لوري خپلې ستونزې وړاندې شوې او په ګډه پر موضوعاتو بحث او لازمې پرېکړې وشوې.
د یادونې وړ ده چې لوړو زده کړو وزارت په لومړي ځل داسې رهبري شورا دایره کړه، چې پکې د دغه وزارت مشرتابه پلاوي، د مرکزي ادارو، امارتي تحصیلي بنسټونو او دیني جامعاتو او تخصصاتو رئیس صاحبانو ګډون کړی و.
