د لوړو زده کړو وزارت او مولانا جلال الدین محمد بلخي پوهنتون تر منځ د همکارۍ هوکړه لیک لاسلیک شو
د یو هوکړه لیک له مخې مولانا جلال الدین محمد بلخي پوهنتون ۲۰۰ سيټه تحصيلي بورسونه د لوړو زده کړو وزارت په واک کې ورکړل.
دغه هوکړه لیک د لوړو زده کړو وزارت د خصوصي محصلانو چارو رئیس پوهنوال احمد ضیاء یوسفزي لخوا په داسې حال کې چې د اکاډمیکو چارو د څار او ارزونې رئیس پوهنمل دوکتور محمد ولي حنیف هم حضور درلود د مولانا جلال الدین محمد بلخي پوهنتون له علمي معاون پوهندوی دوکتور محمد ناصر حیدر سره لاسلیک شو.
د خصوصي محصلانو چارو رئیس وویل چې د یوې څلور کلنې تحصيلي دورې لپاره د ۲۰۰ سيټه بورسونو لمنځه، ۱۰۰ سيټه یې په بشپړه توګه وړیا دي او پاتې ۱۰۰ سيټونه یې ۳۰ سلنه تخفیف لري، چې د لوړو زده کړو مينوالو، د امنیتي ځواکونو د شهیدانو وارثینو او همدارنګه هغو با استعداده ځوانانو ته چې له اقتصادي ستونزو سره مخ دي او د تحصیل له نعمت څخه محروم دي ویشل کیږي.
نوموړي زياته کړه چې ددغو ۲۰۰ سيټه تحصيلي بورسونو لپاره به داوطلبان د هغې هوکړې له مخې چې د یاد هوکړه لیک په متن کې راغلي د خصوصي محصلانو چارو ریاست له لوري معرفي کیږي او د اکاډمیکو چارو د څار او ارزونې ریاست له لوري به یې د څلور کلنې تحصيلي دورې څخه نظارت کیږي.
د جلال الدین محمد بلخي پوهنتون علمي معاون پوهندوی دوکتور محمد ناصر حیدر وویل چې دغه بورسونه به په بلخ ولایت کې د حقوقو او سیاسي علومو، اقتصاد، ژورنالیزم او ښوونې او روزنې په څانګو کې او په سمنګان ولایت کې ددغه پوهنتون په بله څانګه کې د حقوقو او اقتصاد پوهنځیو مینه والو ته ورکول شي.
