د لوړو زده کړو وزارت د تضمین کیفیت او اعتبار ورکولو ریاست تر مشرۍ لاندې په لومړي ځل د تضمین کیفیت او اعتبار ورکولو ورکشاپ په هرات پوهنتون کې جوړ شو

۱۴۰۰کال، د مرغومې ۲۶مه
د لوړو زده کړو وزارت د تضمین کیفیت او اعتبار ورکولو ریاست تر مشرۍ لاندې په لومړي ځل د تضمین کیفیت او اعتبار ورکولو ورکشاپ په هرات پوهنتون کې جوړ شو.
د تضمین کیفیت او اعتبار ورکولو سرپرست رئیس شاکرالله وحیدي د پوهنتونونو له استادانو مننه وکړه چې خپل وخت یې د هېواد ځوانانو ته په تدریس کې لګولی او همدا شان یې د تضمین کیفیت او اعتبار ورکولو پروسې په اړه خبرې وکړې.
ښاغلي وحیدي د هېواد په تحصیلي بنسټونو کې د تضمین کیفیت او اعتبار ورکولو پروګرام پر تطبیق د ټینګار ترڅنګ وویل:  «پوهنتونونه او ښوونیز بنسټونه باید خپل فعالیتونه له داخلي او نړیوالو معیارونو سره سم تنظیم کړي، چې  ټولنېزې، کلتوري او سیاسي ستونزې له منځه یوسي. راځئ د خپلو ځوانانو د استعدادونو پر اساس د سیمې او نړۍ په علمي سیالیو کې مخکښ واوسو او هغه څه چې په نړیوالو ډګرونو کې مو زده کړي، د خپل هېواد په ګټه یې وکاروو.»
د تضمین  کیفیت او اعتبار ورکولو د پروګرامونو ماسټر روزونکي استاد احمدالله هلالي او د تضمین کیفیت او اعتبار ورکولو د بورډ غړي مرستیال پروفیسور دوکتور امان الله فقیري د تضمین کیفیت او اعتبار ورکولو پروسې او معیارونو په اړه ګډونوالو ته معلومات ورکړل.
د محصلانو چارو مرستیال او د هرات پوهنتون رئیس پوهنمل دوکتور محمد داود منیر وویل: «د دا ډول ورکشاپونو ترسره کول د دې ښکارندویي کوي، چې د لوړو زده کړو وزارت د تضمین کیفیت پروګرام ته لومړیتوب ورکړي، تر څو تحصیلي بنسټونه له نړیوالو معیارونو سره سم خپل علمي او اکاډمیک فعالیتونه تنظیم کړي.