د لوړو زده کړو وزارت د تضمین کیفیت او اعتبار ورکونې رئیس او د دې ریاست د ارزونې پلاوي د ننګرهار پوهنتون د کلنۍ بیاکتنې او ارزونې په موخه د دې پوهنتون له مشرتابه سره ناسته وکړه.
د لوړو زده کړو وزارت د تضمین کیفیت او اعتبار ورکونې رئیس استاد شاکر وحیدي په مشرۍ د دغه ریاست د ارزونې اته کسیزه پلاوي د ننګرهار پوهنتون د کلنۍ بیاکتنې او ارزونې په موخه د ننګرهار پوهنتون له رئیس، مرستیالانو او د تضمین کیفیت داخلي واحد مسؤل سره په یاد پوهنتون کې ناسته وکړه.
د لوړو زده کړو وزارت د تضمین کیفیت او اعتبار ورکونې رئیس استاد شاکر وحیدي ننګرهار پوهنتون د هېواد له سترو علمي او اکاډمیکو مرکزونو څخه وباله. نوموړي زیاته کړه سره له دې چې ننګرهار پوهنتون بشپړ اکاډمیک اعتبار اخیستی، خو تضمین کیفیت یوه دوامداره پروسه ده او اړینه ده چې د دې ستر علمي کانون د پرمختګ لپاره لا زیات کار وشي.
ښاغلي وحیدي وویل راغلی اته کسیز پلاوی به د یوې اونۍ په موده کې د ننګرهار پوهنتون اړوند پوهنځي، څانګې، علمي پروګرامونه، علمي، تدریسي او اداري برخې، ملي او نړیوال ژورنالونه او نور اړوند شعبات وارزوي او راپور به یې له اړوندو مسؤلینو سره شریک کړي.
وروسته د ننګرهار پوهنتون رئیس پوهاند دوکتور خلیل احمد بهسودوال راغلي پلاوي ته د ښه راغلاست تر څنګ، د ننګرهار پوهنتون د تاریخچې، تشکیلاتي جوړښت، پوهنځیو او څانګو، علمي پروګرامونو، علمي، تدریسي او رغنیزو فعالیتونو، لاسته راوړنو او شته ستونزو په اړه هر اړخیز معلوماتي وړاندې کړل.
نوموړي زیاته کړه چې ننګرهار پوهنتون څه د پاسه دوه کاله وړاندې د لوړو زده کړو وزارت د تضمین کیفیت او اعتبار ورکونې ملي پروسې په درېیم پړاو کې د هېواد په کچه په لوړو (۸۹،۵) نمرو د بشپړ علمي او اکاډمیک اعتبار سند ترلاسه کړی او تر دې دمه د نوموړي اعتبار د ساتلو او د پوهنتون د علمي او تدریسي حالت د لا ښه والي لپاره په خپل ټول توان هلې ځلې کوي.
