د لوړو زده کړو وزارت د خصوصي پوهنتونونو او موسسو کمېسیون ناسته وشوه
د لوړو زده کړو وزارت د خصوصي پوهنتونونو او موسسو کمېسیون نوبتي ناسته نن د لوړو زده کړو وزیر دوکتور عباس بصیر په مشرۍ وشوه.
دغه غونډه کې د لوړو زده کړو وزیر سربېره علمي معین پوهنمل عبدالتواب بالاکرزي، د مرکزي ریاستونو یوشمېر رییسانو، د مرکزي پوهنتونونو مسوولینو او ځینو نورو کارکوونکو ګډون کړی وو.
د ناستې په پیل کې د لوړو زده کړو وزیر دوکتور عباس بصیر د پیل وینا وکړه او تر هغه وروسته یې له اړوندو ګډونوالو د بېلابېلو خصوصي پوهنتونونو ستونزې او وړاندیزونه واورېدل.
د لوړو زده کړو وزیر زیاته کړه کوم خصوصي پوهنتونونه او د لوړو زده کړو موسسې چې له قوانینو او مقرراتو سرغړونه کوي باید جدي چلند ورسره وشي.
په ورته وخت کې د لوړو زده کړو وزارت علمي معین پوهنمل عبدالتواب بالاکرزي هم د یوشمېر پوهنتونونو پر بنسټپاڼو، د رییسانو، علمي او مالي مرستیالانو او پوهنځیو د رییسانو ګمارنې په اړه له ګډونوالو سره خبرې وکړې.
بل لور ته اصلي او دایمي ودانیو ته د یوشمېر خصوصي لوړو زده کړو موسسو د لېږد راپور هم واورېدل شو او په اړه یې د پام وړ پرېکړې وشوې.
پوهنمل عبدالتواب بالاکرزي وویل چې د خصوصي لوړو زدهکړو موسسو او پوهنتونونو رییسانو، علمي او مالي مرستیالانو او پوهنځیو رییسانو په توګه باید هغه کسان وټاکل شي چې د اړوندې مقررې معیارونه یې پوره کړي وي او دویم ځای کې کومه بله دنده ونه لري.
په پای کې د اړوندو برخو مسوولینو ته لارښوونه وشوه چې د هغو خصوصي پوهنتونونو په اړه خپلې څېړنې بشپړې کړي، چې ستونزې لري.
