د لوړو زده کړو وزارت د رهبري شورا ناسته، د دغه وزارت سرپرست وزیر شیخ الحدیث مولوي نداء محمد ندیم صاحب په مشرۍ تر سره شوه.
د ناستې په پیل کې د لوړو زده کړو سرپرست وزیر د دغه وزارت ټولو مسؤلینو ته سپارښتنه وکړه چې د ګومارنې پر مهال باید تعهد او تخصص ته پام وکړي او په علمي چارو کې په هېڅ وجه غیر مسلکي کسانو ته ځای ورنکړل شي.
دغه راز د لوړو زده کړو سرپرست وزیر وویل چې د وزارت مرکزي ادارو او دویمي واحدونو د تشکیلاتو اړتیاوې په نښه شوي او په دې برخه کې کارونه په چټکۍ روان دي. نوموړي د دغه وزارت مسؤلین خپلو چارو ته لا زیات متوجه کړل، تر څو نوی تحصیلي کال له ستونزو پرته او په ښه ډول پیل شي.
همدارنګه د تېرو شوراګانو پرېکړو ته لنډه کتنه وشوه او د اړوندو کمېټو راپورونه واورېدل شول.
وروسته له اجنډا سره سم د ۱۴۰۲هـ.ش تحصیلي کال د کالیزې او مهالوېش، د دولتي دیني تخصصاتو او جامعاتو د علمي کادري غړو د رتبو د تثبیت او عملي کولو کړنلارې او همدارنګه د خصوصي او دولتي تحصیلي بنسټونو د محصلینو د ځینو ستونزو په اړه بحث او لازمې پرېکړې وشوې.
دغه راز په یاده شورا کې پرېکړه وشوه چې د افغان نړیوال پوهنتون، چې په تېر نظام کې یې فعالیت درلود، د محصلینو د اسنادو طی مراحل او نورې ستونزې حل شي.
