د لوړو زده کړو وزارت د مرکزي ادارو د تشکیلاتي جوړښت د بیاکتنې کمېټې نوبتي غونډه جوړه شوه
د لوړو زده کړو وزارت د مرکزي ادارو د تشکیلاتي جوړښت د بیاکتنې کمېټې نوبتي غونډه نن د دغه وزارت د مالي او اداري چارو مرستیال نور احمد دروېش په مشرۍ جوړه شوه او د ریاست دفتر د جوړښت د بیاکتنې پر طرحه بحث او خبرې وشوي.
د لوړو زده کړو وزارت د مالي او اداري چارو مرستیال نور احمد دروېش وویل چې د ولسمشر په لارښوونه د غونډې موخه د دغه وزارت د ریاست دفتر د تشکیلاتو جوړښت بیا کتنه ده چې د اداري اصلاحاتو او ملکي خدمتونو کمېسیون په همغږۍ به یې بیاکتنه وشي او تر یوې اوونۍ پورې به یې راپور ولسمشر ته وړاندې شي.
په غونډه کې د اجنډا سره سم د دغه وزارت د بشري سرچینو ریاست د اداري پراختیا آمر احمد جاوید قریشي د ریاست دفتر تشکیلاتي جوړښت د یوه پرېزنټېشن له لارې وړاندې کړ چې د دغه ریاست د تشکیلاتي جوړښتونو د لا اغېزناکتیا او بډایه کولو لپاره تخنیکي وړاندیزونه او نظرونه ورکړل شوي.
ورپسې د اداري اصلاحاتو او ملکي خدمتونو کمېسیون د وظیفوی بیاکنتې آمر عبدالحسیب مسعودي وویل چې جوړښت باید د وزارت د اړتیاوو او غوښتنو پر بنسټ او د اداري اصلاحاتو او ملکي خدمتونو کمېسیون د معیارونو په پام کې نیولو سره ترتیب شي چې د دغه وزارت جوړښتونو ته ځواب ویونکي وي او بیا د اداري اصلاحاتو او ملکي خدمتونو کمېسیون سره شریک شي.
همدارنګه په یاده غونډه کې د لوړو زده کړو وزارت د تشکیلاتي جوړښت د بیاکتنې کمېټې غړو د ریاست دفتر د جوړښت د څرنګوالي په اړه هم تخنیکي بحثونه وشول چې وکړای شي اړوند کاري چارې په سمه توګه مدیریت او د کار پروسه ګړندۍ کړي او په دې برخه کې معقول وړاندیزونه وړاندې شول. همدارنګه پرېکړه وشوه چې په دې اړه به په راتلونکو غونډو کې په جزئیاتو خبرې وشي.
