د لوړو زده کړو وزارت د مشرتابه په هدایت د کابل طبي علومو پوهنتون د ډاکټرانو صحي ټیم د وروستۍ زلزلې له امله د خوست
۱۴۴۳/۱۱/۲۳
۱۴۰۱/۴/۲
د لوړو زده کړو وزارت د مشرتابه په هدایت د کابل طبي علومو پوهنتون د ډاکټرانو صحي ټیم د وروستۍ زلزلې له امله د خوست او پکتیکا زیانمنو شوو سره د مرستې په موخه، نن له طبي موادو او درملو سره یوځای پکتیکا ولایت ته سفر وکړ.
د کابل طبي علومو پوهنتون رئیس پوهنیار دوکتور فضل الرحمن رحماني د وروستۍ زلزلې له زیانمنو سره د غمشریکۍ تر څنګ وویل، چې د لوړو زده کړو سرپرست وزیر الحاج مولوي عبدالباقي حقاني په هدایت په خوست او پکتیکا ولایتونو کې د وروستۍ زلزلې له زیانمنو سره د مرستې په موخه، نن ماسپښین د کابل طبي علومو پوهنتون د عملي مرستیال پوهاند دوکتور نجیب الله امیرخېل او د علي اباد تدریسي روغتون د رئیس دوکتور عمادالدین ځاځي په مشرۍ یو صحي ټیم پکتیکا ولایت ته ولېږل شو.
د کابل طبي علومو پوهنتون د رئیس په وینا؛ په پام کې ده چې یاد صحي ټیم به په خوست او پکتیکا ولایتونو کې د وروستۍ زلزلې او سیلانونو له امله د ټپیانو درملنه وکړي او لومړنۍ صحي خدمات به ورته وړاندې کړي.
د یادولو وړ ده چې د تېرې ورځې زلزلې له امله په خوست، پکتیکا او پکتیا ولایتونو کې زموږ زیاتو هېوادوالو ته مالي او ځاني زیانونه واوښتل او د لوړو زده کړو وزارت مشرتابه ټولو تحصیلي بنسټونو ته هدایت وکړ چې د دې پېښې له زیانمنو سره تر خپلې وسې همکاري وکړي، چې په لومړي ګام کې د خوست او پکتیا پوهنتونونو او پکیتکا لوړو زده کړو مؤسسې مشرتابه، استادانو او محصلانو د خپل دیني او بشري مسؤلیت له مخې د زیانمنو مرستې ته ورودانګل او ټپیانو ته یې وینه ورکړه.
