د لوړو زده کړو وزارت د کارونو تعقیب ځانګړې رهبري شورا ناسته د دغه وزارت سرپرست وزیر شیخ الحدیث مولوي نداء محمد ندیم په مشرۍ ترسره شوه.
د ناستې په پیل کې د لوړو زده کړو سرپرست وزیر د رهبري شورا غړو ته د تېر لوی اختر د مبارکۍ تر څنګ، خوښي وښوده چې د اختر مبارکې ورځې د امن په فضاء کې او له کومې ستونزې پرته پای ته ورسېدې.
نوموړي د کارونو جدي تعقیب ته په اشارې سره وویل: «موږ د الله تعالی په سخت امتحان کې یو او د راته سپارل شویو مسؤلیتونو پوښتنه راڅخه کېږي.» هغه مسؤلین خپلو مسؤلیتونو ته متوجه کړل او ویې ویل چې د روان کال د ورځنیو چارو تر څنګ باید مهم کارونه په جدي ډول تعقیب او په ښه توګه پای ته ورسیږي.
وروسته له اجنډا سره سم د رهبري شورا غړو له لوري په تحصیلي بنسټونو او مرکزي ادارو کې د مهمو او بنیادي کارونو د عملي چارو پر ارزونې، تعقیب، له نورو وزارتونو او ادارو سره د هوکړو پر عملي اړخ، د پوهنتونونو تجهیز او ستونزو ته یې رسېدنه، د نوښتګرو محصلینو لپاره د نوښت زمینه برابرول، د استادانو ظرفیت لوړونه، د علمي کنفرانسونو پایلو او په هېواد کې د باکیفیته لوړو زده کړو وړاندې کولو په اړه بحثونه وشول، د موضوعاتو د تعقیب لپاره کمېټې جوړې شوې او مسؤلینو ته دندې وسپارل شوې چې اړوندې چارې جدي تعقیب کړي.
