د لوړو زده کړو وزارت سرپرست او نوماند وزير د افغانستان امريکايي پوهنتون له رييس سره وليدل
د لوړو زده کړو وزارت سرپرست او نوماند وزير دوکتور عباس بصير د افغانستان امريکايي پوهنتون له رييس او تعليمي برخې له مرستيال سره وليدل.
په دې ليدنه کې د افغانستان امريکايي پوهنتون رييس پروفيسور ډېوېډ سېډني د ياد پوهنتون او د پوهنتون د علمي فعاليتونو په اړه معلومات ورکړل او د لوړو زده کړو د نوماند وزير او سرپرست په توګه يې د دوکتور عباس بصير په ټاکنه خوشالي وښوده.
همداراز د لوړو زده کړو نوماند او سرپرست وزير دوکتور عباس بصير، د هېواد د تحصيلي سکتور د ښه والي په برخه کې د خپلو پروګرامونو په اړه معلومات ورکړل زياته يې کړه، د خصوصي او دولتي تحصيلي بنسټونو د کمي او کيفي وړتیاوو د لوړولو، د سېستمونو د ښه والي، علمي څېړنو ته پاملرنه، د بازار د کار له غوښتنې سره سم د محصلينو روزل او د هېواد د تحصيلي نظام د پراختيا له پاره د بهرنيو مرستو جلبول، د هغو پروګرامونو له ډلې دي چې کار به پرې وشي.
