د لوړو زده کړو وزارت علمي معين د بريتش کونسل دفتر له عمومي رییس سره د ويډيو کنفرانس له لارې خبرې وکړې

د لوړو زده کړو وزارت علمي معين د افغانستان د بريتش کانسل د دفتر له عمومي رييس او په افغانستان کې د انګلېستان د بهرنيو چارو وزارت د پوهنې له سلاکار سره د دې وزارت د پروګرامونو او پرمختياوو او د لوړو زده کړو د ځواکمنتيا د پروګرامونو د پلي کولو په اړه خبرې وکړې.

غونډه د وېډيو کنفرانس له لارې وشوه، د لوړو زده کړو علمي مرستيال پوهنمل عبدالتواب بالاکرزي د دې وزارت د پرمختګونو، د درسي نصابونو د پراختیا او اصلاح، د کيفيت تضمين او اعتبار ورکولو، د استادانو د وړتيا لوړاوی، د تشکيلاتي جوړښت منطقي کول او د تقنيني سندونو په اړه خبرې وکړې او د بريتش کونسل دفتر له رييس يې وغوښتل چې د علمي څېړنو او اعتبار ورکولو په برخه کې له لوړو زده کړو وزارت سره د يوه پروګرام په ډول همکاري خپلو همکاريو ته ادامه ورکړي.

په افغانستان کې د بريتش کونسل دفتر عمومي رييس جيمبوت او په افغانستان کې د انګلېستان د بهرنيو چارو وزارت د پوهنې سلاکارې (DFID) د لوړو زده کړو د څو وروستيو کلونو پرمختګونو په اړه د خوښيو په څرګندولو سره وويل چې د لوړو زده کړو وزارت بريتش کونسل دفتر د خپل ښه همکار په توګه پېژني او د دې وزارت په اړه به يې همکارۍ ادامه ولري.

همداراز په افغانستان کې د بريتش کونسل دفتر د علمي پروګرامونو مسولې مېرمن ګل غوټۍ، د کلنۍ څارنې د لارښود کتاب په اړه او د هغو دوره یي پروګرامونو په اړه چې د اعتبارو ورکولو او کيفيت د تضمين، د علمي پروګرامونو د پراختيا د رياستونو، د دولتي پوهنتونونو علمي مرستيالانو او ځينې پوهنتونونو او د خصوصي لوړو زده کړو موسسو له لوري د بريتش کونسل دفتر په ملاتړ په انګريزي ژبه بشپړ شوي دي، زياته يې کړه چې ژباړه يې په دري او پښتو ژبو بشپړه شوې ده، ژر به چاپ او د لوړو زده کړو موسسو ته به د پلي کېډو له پاره ولېږل شي.