د لوړو زده کړو وزارت علمي معین دوکتور لطف الله خیرخواه د روسیې فدراتیف ته د خپل کاري سفر په ترڅ کې؛ د تاتارستان د پوهنې او ساینس له وزیر سره د کتنې ترڅنګ د روسیې فدراتیف او د تاتارستان جمهوریت کازان اسلامي پوهنتونونو څخه هم لیدنه وکړه.
د لوړو زده کړو وزارت علمي معین په داسې حال کې چې د دغه وزارت د بهرنیو اړیکو او د برسونو د تنظیم رئیس ډاکټر نظر محمد عرفان هم حضور درلود، د تاتارستان جمهوریت د پوهنې او ساینس له وزیر سره وکتل.
په دې کتنه کې دواړو لورو د علمي او څېړنيزو تجربو پر تبادلې، دوه اړخيزو علمي همکاريو، سکالرشيپونو، د سيمينارونو د تنظيم او د علاقې وړ نورو موضوعاتو په اړه بحث او خبرې وکړې.
همدارنګه د لوړو زده کړو وزارت علمي معین د روسیې فدراتیف او د تاتارستان جمهوریت د کازان له اسلامي پوهنتونونو څخه لیدنه وکړه او د یادو پوهنتونونو له مسؤلینو سره یې د دوه اړخیزو علمي او اکاډمیکو همکاریو، تحصیلي بورسونو او ګډو علمي سیمینارونو په اړه خبرې وکړې.
د یادولو وړ ده چې د لوړو زده کړو وزارت علمي معین د ا.ا.ا د لوړ پوړي پلاوي په ترکیب کې د «روسیه او اسلامي نړۍ » تر نامه لاندې په څوارلسم اقتصادي کنفرانس کې ګډون په موخه تېره ورځ د روسیې فدراتیف ته سفر وکړ، چې د دې کنفرانس په څنډه کې د تاتارستان جمهوریت د تعلیمي او تحصیلي څانګو له مسؤلینو سره د ملاقات ترڅنګ د دغه هېواد له تعليمي ادارو څخه هم ليدنه وکړه او د هر اړخيزو علمي اړيکو د ټينګښت په موخه يې ورسره خبرې وکړې.
