د لوړو زده کړو وزارت علمي معین د نیمروز له والي سره وکتل
د لوړو زده کړو وزارت علمي معین د نیمروز له والي سره په لیدنه کې په د دغه ولایت د لوړو زده کړو په اړه خبرې وکړې او نظرونه یې سره شریک کړل.
د لیدنې په پیل کې د نیمروز والي زمریالي احدي په دغه ولایت کې د لوړو زده کړو د ښه والي په برخه کې د لوړو زده کړو وزارت له هڅو مننه وکړه او له لوړو زده کړو وزارت څخه یې وغوښتل چې ځينې اړتیاوې یې پوره کړي او ستونزې یې هوارې کړي.
ورپسې پوهنمل عبدالتواب بالاکرزي د نیمروز ولایت د مقام له همکارۍ څخه د مننې تر څنګ، په دغه ولایت کې د لوړو زده کړو د پرمختګ او ځواکمنېدو په اړه وویل، چې د نیمروز لوړو زده کړو موسسې ستونزې او اړتیاوې د دغه وزارت په کاري لومړیتوبونو کې دي او ویې ویل، چې همدا اوس د نیمروز لوړو زده کړو موسسې د تدریسي، اداري او کتابتون ودانیو د پروژو هڅې دوام لري.
د لوړو زده کړو وزارت علمي معین د نیمروز ولایت مسوولانو، لوړو زده کړو وزارت او د دغې موسسې مشرتابه پلاوي تر منځ پر همکاریو او ګډو هڅو ټینګار وکړ او د لوړو زده کړو وزارت له اړخه یې د دغه تحصیلي بنسټ د پرمختګ لپاره د هر ډول هڅو ژمنه وکړه.
