د لوړو زده کړو وزارت علمي معین د پوهاند محمد رسول باوري د جنازې په مراسمو کې ګډون وکړ
د لوړو زده کړو وزارت علمي معین پوهنمل عبدالتواب بالاکرزي نن د پوهاند محمد رسول باوري د جنازې په مراسمو کې ګډون وکړ او د ګلو ګېډۍ په اېښودلو سره یې د علمي او اکاډمیک شخصیت اروا ته دعا وکړه.
د پوهاند محمد رسول باوري د جنازې په مراسمو کې چې د سردارمحمد داودخان روغتون کې ترسره شول، د لوړو زده کړو وزارت د علمي معین سربېره د اطلاعاتو او کلتور وزارت سرپرست، د دولت یوشمېر لوړپوړو چارواکو، د لوړو زده کړو وزارت د نشراتو، اطلاعاتو او اړیکو سرپرست او ویاند، د کابل پوهنتون علمي او د محصلانو چارو مرستیالانو او د پوهنتونونو یوشمېر استادانو او د ارواښاد باوري دوستانو او کورنۍ هم ګډون کړی وو.
پوهنمل عبدالتواب بالاکرزي د پوهاند باوري مړینه د لوړو زده کړو کورنۍ ته یوه ستره ضایعه وبلله او د هېواد اکاډمیکې ټولنې په تېره بیا د هېواد لرغونپوهنې، تاریخ او کلتور په برخه کې د هغه کړنې او خدمتونه ارزښتناک او تلپاتې وګڼل.
د لوړو زده کړو علمي معین د پوهاند محمد رسول باوري کورنۍ او خپلوانو ته د تسلیت ویلو تر څنګ له څښتن تعالی څخه ارواښاد ته د جنت او کورنۍ ته یې د صبر هیله وکړه.
په پام کې ده چې د پوهاند محمد رسول باوري جنازه کندهار ولایت ته ولېږدول شي او په پلرنۍ حضیره کې خاورو ته وسپارل شي.
