د لوړو زده کړو وزارت علمي معین په خپل کاري دفتر کې د ازبیکستان هېواد له سفیر سره وکتل.
په یاده لیدنه کې د لوړو زده کړو وزارت علمي معین دوکتور لطف الله خیرخواه د ازبیکستان هېواد له سفیر سره په یاد هېواد کې د افغان محصلینو د ستونزو پر حل، افغان محصلینو ته د بورسونو ورکړې او پر دوه اړخیزو علمي اړیکو خبرې وکړې.
نوموړي په تحصیلي ډګر کې له افغانستان سره د ازبیکستان هېواد له همکاریو مننه وکړه او د دواړو هېوادونو دیني، ژبنیو او کلتوري مشترکاتو ته په اشارې سره، پر دوه اړخیزو علمي او اکاډمیکو همکاریو ټینګار وکړ.
دغه راز په افغانستان کې د ازبیکستان سفیر یاد ګار خواجه شادمانوف وویل چې اوسمهال ۴۳ افغان محصلین په ازبیکستان کې په زده کړو بوخت دي. نوموړي په روان کال کې افغانستان ته په بېلا بېلو پوهنځيو کې د لېسانس په کچه د ۵۰ تحصیلي بورسونو د ورکړې خبر ورکړ او له افغانستان سره یې دوه اړخیزو علمي همکاریو ته تیاری وښود.
